సుప్రీంకోర్టులో కేజ్రీవాల్‌కు చుక్కెదురు

న్యూఢిల్లీ:  ఢిల్లీ ముఖ్యమంత్రి, ఆమ్ ఆద్మీ పార్టీ (ఆప్) అధినేత అరవింద్ కేజ్రీవాల్‌కు సుప్రీంకోర్టులో చుక్కెదురైంది.  ఢిల్లీ మద్యం పాలసీకి సంబంధించిన అవినీతి కేసులో తన మధ్యంతర బెయిల్‌ను మరో 7 రోజుల పాటు పొడిగించాలని కోరుతూ అరవింద్ కేజ్రీవాల్ చేసిన పిటిషన్‌ను విచారించబోమని సుప్రీంకోర్టు బుధవారం తెలిపింది. సాధారణ బెయిల్‌ కోసం ట్రయల్‌ కోర్టును ఆశ్రయించే స్వేచ్ఛ ముఖ్యమంత్రికి ఉన్నందున, ఈ పిటిషన్‌ను కొనసాగించడం సాధ్యం కాదని ధర్మాసనం రిజిస్ట్రీ దరఖాస్తును అంగీకరించడానికి నిరాకరించింది. లోక్‌సభ ఎన్నికల ప్రచారం కోసం కేజ్రీవాల్‌కు మే 10న సుప్రీంకోర్టు మధ్యంతర బెయిల్ మంజూరు చేసింది. 

జూన్ 2న లొంగిపోవాలని ఆదేశించింది. దరఖాస్తును స్వీకరించడానికి నిరాకరించిన సుప్రీం కోర్టు, అరెస్టు సవాలుపై ఇప్పటికే తీర్పు రిజర్వ్ చేయబడినందున, మధ్యంతర బెయిల్ పొడిగింపు కోసం కేజ్రీవాల్ చేసిన విజ్ఞప్తికి ప్రధాన పిటిషన్‌తో సంబంధం లేదని పేర్కొంది. కేజ్రీవాల్ వైద్యపరమైన కారణాలతో పొడిగించాలని కోరగా, ఈరోజు అత్యవసర విచారణ కోసం కోర్టును అభ్యర్థించారు. అరెస్ట్ తర్వాత కేజ్రీవాల్ 7 కిలోల బరువు తగ్గారని, ఆయన శరీరంలో కీటోన్ స్థాయిలు చాలా ఎక్కువగా ఉన్నాయని పిటిషన్‌ లో ఆప్ పేర్కొంది.