వెంకటాపూర్(రామప్ప),(విజయక్రాంతి): మండలంలోని ప్రపంచ ప్రఖ్యాత గాంచిన యునెస్కో వారసత్వ సంపద అయిన రామప్ప దేవాలయాన్ని స్వీడన్ దేశానికి చెందిన పర్యాటకుడు మైకేల్ సందర్శించారు. ఈ సందర్భంగా ఆలయంలో ప్రత్యేక పూజలు నిర్వహించగా అర్చకులు హరీష్ శర్మ, ఉమాశంకర్ లు వారికి తీర్థప్రసాదాలు అందజేశారు. ఆలయ చరిత్ర, శిల్పకళ వైభవం, కట్టడ నిర్మాణ శైలి, కళాత్మక ప్రతిభను స్టేట్ టూరిజం గైడ్ సాయినాథ్, విజయ్ కుమార్ లు మైకేల్‌కు వివరించారు. రామప్ప దేవాలయ సౌందర్యం, శిల్పకళ, ప్రకృతి అందాలను చూసి మైకేల్ ఆశ్చర్యపోయి ప్రశంసలు కురిపించారు. అనంతరం ఆయన రామప్ప చెరువును సందర్శించి బోటింగ్‌ చేశారు. వారి వెంట దేవాదాయ, టూరిజం, పురావస్తు శాఖల సిబ్బంది, టూరిస్ట్ పోలీసులు ఉన్నారు.