24 June, 2026 | 2:31 AM 
నృత్యం చేస్తూ ప్రాణాలు విడిస్తేనే..
బాలీవుడ్ స్టార్ హీరోయిన్ శ్రద్ధా కపూర్ ప్రధాన పాత్రలో నటిస్తున్న తాజా బయోపిక్ ‘ఈథా’. ఈ మూవీ టీజర్ మంగళవారం విడుదలై, సోషల్ మీడియాలో విశేష స్పందనతో దూసుకుపోతోంది. ‘స్త్రీ 2’ వంటి భారీ బ్లాక్బస్టర్ తర్వాత శ్రద్ధా కపూర్ నటిస్తున్న ఈ చిత్రంపై అంచనాలు భారీగా పెరిగాయి.
మహారాష్ట్రకు చెందిన ప్రసిద్ధ జానపద నృత్య కళాకారిణి, లావణి నృత్య సామ్రాజ్ఞి ‘విఠాబాయి భౌ మాంగ్ నారాయణగాంకర్’ జీవిత కథ ఆధారంగా ఈ చిత్రం తెరకెక్కుతోంది. వేదికపై తను చేసిన ప్రదర్శనలు, కళ కోసం ఆమె చేసిన త్యాగాల చుట్టూ ఈ కథ తిరుగుతుంది. ‘ఛావా’ చిత్రంతో ఘన విజయాన్ని అందుకున్న లక్ష్మణ్ ఉటేకర్ ఈ చిత్రానికి దర్శకత్వం వహిస్తున్నారు. తాజా టీజర్లో అత్యంత కీలకమైన, సంచలనాత్మకమైన సీన్ ఆకట్టుకుంటోంది. శ్రద్ధా కపూర్ తొమ్మిది నెలల గర్భవతిగా ఉండి, ప్రదర్శన ఇస్తున్న సమయంలోనే ఆమెకు ప్రసవ వేదన వస్తుంది.
స్టేజీ వెనుక బిడ్డకు జన్మనిచ్చిన మరుక్షణమే, బొడ్డుతాడును కత్తిరించుకుని మళ్లీ స్టేజీపైకి వచ్చి ఆమె నృత్యం చేస్తుంది. ఈ సీన్ చూస్తున్న ప్రతి ఒక్కరినీ అమితంగా కదిలిస్తోంది. మరాఠీ సాంప్రదాయ నౌవారి శైలి చీరకట్టులో శ్రద్ధా కపూర్ లుక్, హావభావాలు అద్భుతంగా ఉన్నాయి.
గర్భవతిగా ఉంటూనే కళ కోసం ప్రాణాలను సైతం లెక్కచేయకుండా ఆమె చూపించిన నటన ఆమె కెరీర్లోనే అత్యుత్తమమైనదిగా నిలుస్తుందని నెటిజన్లు కొనియాడుతున్నారు. ఈ టీజర్లో శ్రద్ధా కపూర్ పలికిన ఒక డైలాగ్ సినిమా తీవ్రతను తెలియజేస్తోంది. ‘పడకపై ఉండి చనిపోతే నన్ను ఒక అభాగ్యురాలిగా చూస్తారు, అదే నృత్యం చేస్తూ ప్రాణాలు విడిస్తే ఒక చరిత్రగా మిగిలిపోతాను’ అనే డైలాగ్ రోమాంచితంగా ఉంది.
మ్యాడ్టాక్ ఫిలిమ్స్ బ్యానర్పై దినేశ్ విజన్ నిర్మిస్తున్న ఈ చిత్రంలో విజువల్స్, అజయ్-అతుల్ అందించిన బ్యాక్గ్రౌండ్ మ్యూజిక్ టీజర్ను మరో స్థాయికి తీసుకెళ్లాయి. ఈ చిత్రంలో శ్రద్ధా కపూర్తో పాటు రన్దీప్ హుడా, నానా పటేకర్, మహ్మద్ జీషాన్ అయూబ్ కీలక పాత్రల్లో నటిస్తున్నారు. ఈ చిత్రాన్ని రక్షాబంధన్ కానుకగా ఇదే ఏడాది ఆగస్టు 28న ప్రపంచవ్యాప్తంగా థియేటర్లలో విడుదల చేయనున్నట్లు చిత్ర బృందం అధికారికంగా ప్రకటించింది. మొత్తంగా చూస్తే, ఈథా టీజర్ శ్రద్ధా కపూర్ కెరీర్లోనే ఒక మైలురాయిగా నిలిచే చిత్రంగా కనిపిస్తోందని సినీ విశ్లేషకులు అభిప్రాయపడుతున్నారు.
