హైదరాబాద్: చిన్న రోడ్డు ప్రమాదం తర్వాత ఇద్దరు వ్యక్తులపై దాడి చేసినందుకు 17 ఏళ్ల బాలుడితో సహా ముగ్గురిని బండ్లగూడ పోలీసులు(Bandlaguda Police) మంగళవారం అరెస్టు చేశారు. అరెస్టయిన వారిని ఎం ఎ జాకి (30), మొహమ్మద్ అబ్దుల్ సఫీ (18), 17 ఏళ్ల బాలుడిగా గుర్తించారు. పోలీసులు తెలిపిన వివరాల ప్రకారం, ఆదివారం మధ్యాహ్నం 1 గంటల ప్రాంతంలో, బాధితులు సయ్యద్ అబిద్, అతని స్నేహితుడు సయ్యద్ యూసుఫ్ మోటార్ సైకిల్ పై ప్రయాణిస్తుండగా.. సవేరా హోటల్ సమీపంలోని యు-టర్న్ వద్దకు చేరుకున్నప్పుడు, వేగంగా వస్తున్న కారు వారి బైక్ ను ఢీకొట్టింది. "ముగ్గురు అనుమానితులు కారు దిగి అబిద్, యూసుఫ్‌లను చేతులు, ప్లాస్టిక్ క్రికెట్ బ్యాట్‌తో కొట్టారు. ఇద్దరికీ గాయాలు అయ్యాయి. చికిత్స కోసం ఆసుపత్రికి తరలించారు" అని చంద్రాయణగుట్ట ఏసీపీ ఎ సుధాకర్ తెలిపారు. ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు. వీడియోలు, సిసిటివి ఫుటేజ్ సహాయంతో ముగ్గురిని గుర్తించి, తరువాత అరెస్టు చేశారు.