హైదరాబాద్: నిషేధిత సీపీఐ (Telangana Maoist Surrender) పార్టీకి చెందిన ఇద్దరు సీనియర్ నాయకులు గురువారం రాచకొండ పోలీస్ కమిషనర్(Rachakonda Police Commissioner) ముందు లొంగిపోయారు. లొంగిపోయిన నాయకులను మేడ్చల్‌-మల్కాజిగిరి జిల్లా యాప్రాల్‌కు చెందిన మాల సంజీవ్‌ అలియాస్‌ అశోక్‌ అలియాస్‌ లెంగు దాదా (62), నాగర్‌కర్నూల్‌ జిల్లా వంకేశ్వరానికి చెందిన అతని భార్య పెరుగుల పార్వతి అలియాస్‌ బొంతల పార్వతి అలియాస్‌ దీనా (50)గా గుర్తించారు.

ఇద్దరూ దండకారణ్య స్పెషల్ జోనల్ కమిటీ ( Dandakaranya Special Zonal Committee) కింద రాష్ట్ర కమిటీ సభ్యులు (SCM) హోదాను కలిగి ఉన్నారు. మావోయిస్టు సాంస్కృతిక విభాగం, చైతన్య నాట్య మంచ్ (CNM)లో చురుకుగా ఉన్నారు. సంజీవ్ 1980లో విప్లవ గాయకుడు గద్దర్ ఆధ్వర్యంలో జన నాట్య మండలి (Jana Natya Mandali) ద్వారా మావోయిస్టు ఉద్యమంలో చేరాడు. తరువాత సాయుధ విభాగంలో రాష్ట్ర కమిటీ సభ్యుడయ్యాడు. అతను 16 రాష్ట్రాలలో సాంస్కృతిక కార్యక్రమాలను నిర్వహించాడు. తెలంగాణ, ఛత్తీస్‌గఢ్‌లలో జరిగిన పెద్ద కాల్పులతో సహా అనేక ఎన్‌కౌంటర్‌ల నుండి బయటపడ్డాడు. దీనా 1992లో ఉద్యమంలో చేరి, బస్తర్ ప్రాంతంలోని గిరిజన వర్గాలను సమీకరించడంలో, సాంస్కృతిక ప్రచారంలో కీలక పాత్ర పోషించింది. ఆమె హిందీ, తెలుగు,  కోయా భాషలలో పాటలను కంపోజ్ చేసి ప్రదర్శించింది. 2017లో ఎన్‌కౌంటర్ నుండి తప్పించుకుంది.