హృతిక్ రోషన్ చేసిన పనికి రాకేశ్ షాక్!

బాలీవుడ్ స్టార్ హీరో హృతిక్ రోషన్ తన తొలి చిత్రం ‘కహో నా ప్యార్ హై’ (Kaho Naa Pyaar Hai) సమయంలో జరిగిన ఓ ఆసక్తికర సంఘటనను గతంలో వెల్లడించారు. ఈ సినిమాకు దర్శకత్వం వహించిన తన తండ్రి రాకేశ్ రోషన్‌కు తెలియకుండానే ఎడిటింగ్‌లో కొన్ని మార్పులు చేసేవాడినని తెలిపారు. ఓ పాత ఇంటర్వ్యూలో హృతిక్ ఈ విషయాలను గుర్తుచేసుకున్నారు.

సినిమా ఎడిటింగ్ (Film Editing) ప్రక్రియలో రాకేశ్ రోషన్ ఎంతో కఠినంగా, నిష్పక్షపాతంగా వ్యవహరించేవారని హృతిక్ తెలిపారు. కొడుకు అనే మమకారం చూపకుండా, తాను ఎంతో బాగా నటించానని భావించిన షాట్లను సైతం తండ్రి నిర్దాక్షిణ్యంగా తొలగించేవారని చెప్పారు. తాను ఎంతో కష్టపడి చేసిన సన్నివేశాలు కత్తెరకు గురవుతుండటంతో హృతిక్ కొంత బాధపడేవారు. ఈ క్రమంలోనే ఓ ఉపాయం ఆలోచించారు.

రోజూ ఎడిటింగ్ పనులు ముగించుకుని రాకేశ్ రోషన్ ఇంటికి వెళ్లిన తర్వాత హృతిక్ రహస్యంగా ఆటోలో తిరిగి ఎడిటింగ్ స్టూడియోకు వెళ్లేవారు. తన వద్ద ఉన్న తాళాలతో గదిని తెరిచి, తండ్రి తొలగించిన షాట్లను తిరిగి సినిమాలో చేర్చేవారు. ఆ మార్పులను ఎడిటర్‌కు చూపించి సన్నివేశం బాగుందో లేదో అడిగేవారు. ఎడిటర్ కూడా బాగుందని సంతృప్తి వ్యక్తం చేయడంతో, మరుసటి రోజు ఆ మార్పులను తన తండ్రికి చూపించాలని కోరేవారు.

ఆ సన్నివేశాలను చూసిన రాకేశ్ రోషన్, ఇదంతా తన కొడుకు చేసిన పనేనని గుర్తించి కొద్దిసేపు మౌనంగా ఉండిపోయేవారు. అయితే ఆ మార్పులతో సన్నివేశాలు మరింత మెరుగ్గా రావడంతో చివరకు వాటిని అంగీకరించేవారని హృతిక్ నవ్వుతూ వెల్లడించారు. తండ్రీకొడుకుల మధ్య సాగిన ఈ ఆసక్తికరమైన ఎడిటింగ్ దోబూచులాటల నడుమ రూపుదిద్దుకున్న ‘కహో నా ప్యార్ హై’ చిత్రం హృతిక్ కెరీర్‌లో సంచలన విజయంగా నిలిచింది.