మొంథా తుపాన్ తీవ్రతరం: విద్యుత్ శాఖ హై అలర్ట్

అమరావతి: పశ్చిమ-మధ్య బంగాళాఖాతంలో ఏర్పడిన మొంథా తుఫాను(Cyclone Montha Intensifies) తీవ్ర తుఫానుగా మారడంతో విద్యుత్ శాఖ అప్రమత్తం అయింది. ముందు జాగ్రత్త చర్యగా, ఏదైనా అంతరాయం ఏర్పడితే విద్యుత్ సరఫరాను త్వరగా పునరుద్ధరించడానికి శాఖ కొత్త స్తంభాలు, ట్రాన్స్‌ఫార్మర్‌లను సిద్ధం చేసింది. సహాయం కోసం, APEPDCL టోల్-ఫ్రీ నంబర్ 1912 ను సంప్రదించవచ్చు. కోనసీమ జిల్లా స్థాయి హెల్ప్‌లైన్ నంబర్ 9440904477.

పశ్చిమ మధ్య బంగాళాఖాతం మీదుగా ఏర్పడిన 'మొంథా' తుఫాను గత ఆరు గంటల్లో గంటకు 15 కిలోమీటర్ల వేగంతో ఉత్తరం నుండి వాయువ్య దిశగా కదిలి మంగళవారం ఉదయం 5.30 గంటలకు తీవ్ర తుఫానుగా మారిందని వాతావరణ శాఖ తెలిపింది. తుఫాను మంగళవారం రాత్రి కాకినాడ సమీపంలోని మచిలీపట్నం-కళింగపట్నం మధ్య ఆంధ్రప్రదేశ్ తీరాన్ని దాటే అవకాశం ఉంది. తుఫాను ప్రస్తుతం మచిలీపట్నం నుండి 190 కి.మీ, కాకినాడ నుండి 270 కి.మీ, విశాఖపట్నం నుండి 340 కి.మీ దూరంలో కేంద్రీకృతమై ఉందని ఆంధ్రప్రదేశ్ రాష్ట్ర విపత్తు నిర్వహణ అథారిటీ (APSDA) ఉదయం తెలిపింది.