డెహ్రాడూన్: ఉత్తరాఖండ్‌లోని హిమాలయాల ఒడిలో కొలువైన శతాబ్దాల నాటి బద్రీనాథ్, కేదార్‌నాథ్(Badrinath-Kedarnath) ఆలయాల్లోకి త్వరలో కేవలం హిందువులను మాత్రమే అనుమతించనున్నారు. చార్ ధామ్ తీర్థయాత్రలో భాగమైన ఈ రెండు ఆలయాల్లోకి హిందూయేతరులను ప్రవేశించకుండా నిషేధిస్తున్నట్లు ఈ పుణ్యక్షేత్రాలను నిర్వహించే ఆలయ సంస్థ ప్రకటించింది. హిందువులు కానివారిని నిషేధించే ఈ నిబంధన బద్రీనాథ్-కేదార్‌నాథ్ ధామ్‌తో సహా, బద్రీనాథ్-కేదార్‌నాథ్ దేవస్థాన కమిటీ (బీకేటీసీ) నియంత్రణలో ఉన్న అన్ని దేవాలయాలకు వర్తిస్తుంది.

ఈ విషయాన్ని ధృవీకరిస్తూ, బీకేటీసీ ​​అధ్యక్షుడు హేమంత్ ద్వివేది మాట్లాడుతూ, దేవస్థాన కమిటీ పరిధిలోని అన్ని దేవాలయాలలో హిందువులు కానివారి ప్రవేశం నిషేధించబడుతుందని తెలిపారు. ఈ మేరకు ఒక ప్రతిపాదన రాబోయే ఆలయ కమిటీ బోర్డు సమావేశంలో ఆమోదించబడుతుంది. ఆరు నెలల శీతాకాలపు విరామం తర్వాత బద్రీనాథ్ ఆలయం ఏప్రిల్ 23న తిరిగి తెరుచుకోనుంది. కేదార్‌నాథ్ ఆలయ ద్వారాలు తెరిచే తేదీని మహాశివరాత్రి నాడు ప్రకటిస్తారు. కేదార్‌నాథ్, బద్రీనాథ్‌తో పాటు, చోటా చార్ ధామ్‌లో భాగమైన ఇతర రెండు పుణ్యక్షేత్రాలు గంగోత్రి, యమునోత్రి. అక్షయ తృతీయ సందర్భంగా ఏప్రిల్ 19న ఈ ఆలయాల తలుపులు తిరిగి తెరవబడతాయి.