చెన్నై: తమిళనాడులో బాంబు బెదిరింపు కలకలం రేపింది. ఆదివారం తెల్లవారుజామున తమిళనాడు ముఖ్యమంత్రి ఎంకె స్టాలిన్ నివాసం వద్ద, నీలంకరైలోని తమిళగ వెట్రి కజగం(TVJK) అధినేత, నటుడు విజయ్ నివాసానికి కూడా బాంబు అమర్చినట్లు గుర్తు తెలియని వ్యక్తి చెన్నై పోలీస్ కంట్రోల్ రూమ్‌కు ఫోన్ చేసి చెప్పాడు. ఈ ఆందోళనకరమైన కాల్‌కు ఉన్నత స్థాయి భద్రతా స్పందించింది. బెదిరింపు సమాచారం అందిన వెంటనే పోలీసులు బాంబు నిర్వీర్య దళాన్ని, స్నిఫర్ డాగ్ యూనిట్‌ను సీఎం అధికారిక నివాసానికి పంపారు. ప్రాంగణం అంతటా క్షుణ్ణంగా తనిఖీలు నిర్వహించిన అధికారులు ఇంటి ప్రతి మూలను, దాని పరిసరాలను జల్లెడ పట్టారు.

గంటకు పైగా జరిగిన క్షుణ్ణ తనిఖీ తర్వాత బాంబు బెదిరింపు అబద్ధమని పోలీసులు నిర్ధారించారు. ఆవరణలో ఎటువంటి పేలుడు పదార్థాలు, అనుమానాస్పద వస్తువులు కనబడలేదన్నారు. ఈ నకిలీ కాల్ వెనుక ఉన్న వ్యక్తిని పోలీసులు గుర్తించారు. విఘ్నేష్ అనే వ్యక్తి చెన్నైపోలీస్ కంట్రోల్ రూమ్ కు ఫోన్ చేసి, ఇవాళ సాయంత్రం ఆసుపత్రి నుంచి డిశ్చార్జ్ కావాడానికి ముందే సీఎం నివాసంలో బాంబు పెట్టామని చెప్పినట్లు అధికారులు పేర్కొన్నారు. ఈ సంఘటనను తీవ్రంగా పరిగణిస్తున్నామని మరియు భయాందోళనలు సృష్టించి, ప్రజా శాంతిని దెబ్బతీసేందుకు ప్రయత్నించిన వ్యక్తిపై తగిన చట్టపరమైన చర్యలు తీసుకుంటామని సీనియర్ పోలీసు అధికారులు ధృవీకరించారు.

దర్యాప్తులో సహాయం చేయడానికి సైబర్, సాంకేతిక బృందాలను రంగంలోకి దించారు. తమిళనాడులో ఇలాంటి నకిలీ బాంబు బెదిరింపులు నివేదించబడటం ఇదే మొదటిసారి కాదు. గత ఏడాది ప్రభుత్వ కార్యాలయాలు, షాపింగ్ మాల్స్, పాఠశాలలు, రైల్వే స్టేషన్లతో సహా అనేక ప్రముఖ ప్రదేశాలకు ఇలాంటి మోసపూరిత బెదిరింపులు వచ్చాయని, దీని వలన తరచుగా తరలింపులు భద్రతా చర్యలు చేపట్టామని అధికారులు వెల్లడించారు. ఏప్రిల్ 2023లో, చెన్నై, కోయంబత్తూరు అంతటా అనేక పాఠశాలలకు బాంబులు అమర్చుతామని హెచ్చరికతో ఇమెయిల్ బెదిరింపులు, 2024 ప్రారంభంలో మరొక సందర్భంలో మద్రాస్ హైకోర్టు ప్రాంగణాన్ని లక్ష్యంగా చేసుకుని బెదిరింపు కాల్ వచ్చింది. పదే పదే నకిలీ కాల్‌లు రావడం వల్ల అత్యవసర ప్రతిస్పందన వ్యవస్థలు సున్నితత్వాన్ని కోల్పోయే ప్రమాదం ఉందని, విలువైన ప్రజా వనరులను హరించే అవకాశం ఉందని భద్రతా నిపుణులు హెచ్చరించారు.

ఇలాంటి దుశ్చర్యలకు పాల్పడే వారిపై కఠినమైన చట్టపరమైన చర్యలు ఉంటాయని, ప్రజలు ఇలాంటి దుశ్చర్యలకు పాల్పడకుండా ఉండాలని పోలీసులు విజ్ఞప్తి చేశారు. ఇంతలో ఇటీవల వైద్య చికిత్స చేయించుకుని ఆసుపత్రి బెడ్‌పై నుంచి రాష్ట్రాన్ని పరిపాలిస్తున్న సీఎం స్టాలిన్‌కు ఈ పరిణామం గురించి వెంటనే సమాచారం అందింది. దీంతో ముందు జాగ్రత్త చర్యగా తమినాడు ముఖ్యమంత్రి నివాసం చట్టుప్రక్కల భద్రతను కట్టుదిట్టం చేశారు.