రామభద్రపురం: విజయనగరం జిల్లా రామభద్రపురం ఆర్టీసీ బస్ కాంప్లెక్స్‌లో(RTC Bus Complex) శనివారం డ్యూటీలో ఉండగా బస్సు కండక్టర్(Conductor) గుండెపోటుతో మరణించాడు. మృతుడిని దాసుగా గుర్తించారు. సాలూరు నుండి విశాఖపట్నం వెళ్తున్న బస్సులో ప్రయాణిస్తున్న ఆయన బస్సు కాంప్లెక్స్ నుంచి వాహనం దిగిన కొద్దిసేపటికే అకస్మాత్తుగా తన సీటులో కుప్పకూలిపోయారు. అప్రమత్తమైన ప్రయాణికులు, సిబ్బంది వెంటనే ఆయనను చికిత్స కోసం ఒక ప్రైవేట్ ఆసుపత్రికి తరలించారు. వైద్యులు ఎంత ప్రయత్నించినప్పటికీ, చికిత్స పొందుతూ దాసు మరణించాడు. ఆయనకు భార్య, ఇద్దరు కుమారులు, ఒక కుమార్తె ఉన్నారు. కుటుంబ పెద్ద మరణించడంతో వారి కుటుంబం కన్నీరుమున్నీరుగా విలపిస్తోంది.