కోల్‌కతా: పశ్చిమ బెంగాల్‌లోని ఉత్తర 24 పరగణాల జిల్లాలోని రాజర్‌హట్(Rajarhat) ప్రాంతంలో శుక్రవారం ఉదయం ఒక ప్రయాణీకుల బస్సు రెయిలింగ్‌ను బద్దలు కొట్టుకుని కాలువలోకి(Bus falls into canal) పడిపోయిన ఘటనలో అనేక మంది గాయపడ్డారని పోలీసులు తెలిపారు. మరో బస్సును ఓవర్‌టేక్ చేసే ప్రయత్నంలో డ్రైవర్ వాహనంపై నియంత్రణ కోల్పోవడంతో ఈ ప్రమాదం జరిగిందని తెలుస్తోంది. సాల్ట్ లేక్‌లోని కరుణమోయికి వెళ్తుండగా, బస్సు రోడ్డు పక్కన అదుపు తప్పి, రెయిలింగ్‌ను బద్దలు కొట్టుకుని, నీటిలో పడిపోయింది. సమాచారం అందుకున్న అధికారులు, పోలీసులు ఘటనాస్థలికి చేరుకుని క్రేన్ సహాయంతో బస్సును బయటకు తీస్తున్నారు. 

భయాందోళనకు గురైన ప్రయాణికులు సహాయం కోసం కేకలు వేయడంతో స్థానికులు సంఘటనా స్థలానికి చేరుకుని సహాయక చర్యలు చేపట్టారని ప్రాథమిక నివేదికలు తెలిపాయి. ప్యాసింజర్ బస్సు ప్రమాదంలో 40 మంది ప్రయాణికులు గాయపడినట్లు అధికారులు తెలిపారు. గాయపడిన వారిని దేగంగా ఆసుపత్రికి, సమీపంలోని ప్రైవేట్ ఆసుపత్రికి తరలించారు. బస్సు ఉదయం 7:30 గంటల ప్రాంతంలో రైలింగ్‌ను విరిగి రాజర్హత్-హరోవా కాలువలోకి పడిపోయిందని పోలీసులు తెలిపారు. ప్రమాద సమయంలో వాహనంలో దాదాపు 50 మంది ప్రయాణికులు ఉన్నారు. బస్సు వేగంగా వెళ్లడంతోనే నియంత్రణ కోల్పోయి కాలువలోకి బోల్తా పడిందని ప్రత్యక్ష సాక్షులు ఆరోపించారు. ప్రమాదానికి గల కారణాలను తెలుసుకోవడానికి పోలీసులు దర్యాప్తు ప్రారంభించారు.