హైదరాబాద్: జూబ్లీహిల్స్ ఉప ఎన్నికలో(JubileeHills by election) కాంగ్రెస్ ఎమ్మెల్యే అభ్యర్థి నవీన్ యాదవ్(Congress candidate Naveen Yadav) ఓటు వేశారు. సింపతీలకు పోవద్దని, అభివృద్ధికి ఓటేయ్యండని నవీన్ యాదవ్ ఓటర్లను కోరారు. మంగళవారం తొలి రెండు గంటల్లోనే దాదాపు 10.2 శాతం ఓటింగ్ నమోదైంది. నియోజకవర్గంలోని మొత్తం 407 పోలింగ్ కేంద్రాలలో ఉదయం 7 గంటలకు పోలింగ్ ప్రారంభమైంది. ఎన్నికల సంఘం ప్రకారం, ఉదయం 11 గంటల వరకు 20.76 శాతం ఓట్లు పోలయ్యాయి. జూబ్లీహిల్స్ నగరం నడిబొడ్డున ఉన్న అనేక మధ్యతరగతి, బలహీన వర్గాల కాలనీలు, మురికివాడలు ఉన్న ఈ నియోజకవర్గంలో ప్రారంభ గంటల్లో ఓ మోస్తరు పోలింగ్ నమోదైంది. భారత రాష్ట్ర సమితి (Bharat Rashtra Samithi) సిట్టింగ్ ఎమ్మెల్యే మాగంటి గోపీనాథ్ మరణంతో తప్పనిసరి అయిన ఈ ఉప ఎన్నికలో నాలుగు లక్షలకు పైగా ఓటర్లు తమ ఓటు హక్కును వినియోగించుకోనున్నారు.

జూబ్లీహిల్స్ ఎన్నికల బరిలో మొత్తం 58 మంది అభ్యర్థులు పోటీ పడుతున్నారు. అయితే ప్రధాన పోటీ అధికార కాంగ్రెస్ పార్టీ, ప్రతిపక్షబీఆర్ఎస్, బీజేపీ మధ్యే ఉంది. బీఆర్ఎస్ గోపీనాథ్ భార్య సునీతను బరిలోకి దింపగా, నవీన్ యాదవ్ కాంగ్రెస్ టికెట్‌పై బరిలోకి దిగారు. బీజేపీ మరోసారి లంకాల దీపక్ రెడ్డిని బరిలోకి దింపింది. ఎల్లారెడ్డి గూడా శ్రీ కృష్ణ దేవరాయ వెల్ఫేర్ సెంటర్ బూత్ నెంబర్–290లో బీఆర్ఎస్ అభ్యర్థి మాగంటి సునీత గోపీనాథ్(BRS candidate Maganti Sunitha Gopinath) ఓటు హక్కు వినియోగించుకున్నారు. ఓటర్లందరూ తమ ఓటు హక్కును వినియోగించుకోవాలని ఆమె విజ్ఞప్తి చేశారు. పోలింగ్ ప్రక్రియను పరిశీలించడానికి జిల్లా ఎన్నికల అధికారి ఆర్.వి. కర్ణన్ బోరబండలోని పోలింగ్ కేంద్రాన్ని సందర్శించారు. 11 చోట్ల ఎలక్ట్రానిక్ ఓటింగ్ యంత్రాలలో (EVMలు) కొన్ని సాంకేతిక సమస్యలు ఉన్నాయని, వాటిని సరిదిద్దామని పేర్కొన్నారు. సాయంత్రం 6 గంటల వరకు పోలింగ్ ప్రక్రియ కొనసాగుతుందని, సాయంత్రం 6 గంటలకు పోలింగ్ కేంద్రాల వద్ద క్యూలలో నిలబడి ఉన్న ఓటర్లకు ఓటు వేయడానికి అనుమతి ఉంటుందని ప్రధాన ఎన్నికల అధికారి సి. సుదర్శన్ రెడ్డి తెలిపారు. పోలింగ్ సజావుగా, స్వేచ్ఛగా, నిష్పాక్షికంగా జరిగేలా ఎన్నికల సంఘం విస్తృత ఏర్పాట్లు చేసింది.