అకాల వర్షం దెబ్బతో ధాన్యం నష్టం

కొనుగోళ్లు వేగవంతం చేయాలని బీఆర్‌ఎస్ హెచ్చరిక

అశ్వాపురం, మే 3 (విజయక్రాంతి): మండల పరిధిలోని మొండికుంట గ్రామంలో అకాల వర్షం కారణంగా శనివారం సాయంత్రం వడ్ల కళ్లంలో నిల్వ ఉంచిన ధాన్యం తీవ్రంగా తడిసి రైతులు ఆందోళనకు గురయ్యారు; కాటా పెట్టిన బస్తాలు నీటికి గురికావడంతో ధాన్యం నాణ్యత దెబ్బతినే ప్రమాదం ఏర్పడగా, పలుచోట్ల రైతులు ఒడ్లపై ధాన్యాన్ని ఆరబోసేందుకు ప్రయత్నిస్తున్నా మళ్లీ వర్షం పడుతుందేమోనన్న భయంతో గందరగోళ పరిస్థితులు నెలకొన్నాయి.

ఇదే నేపథ్యంలో గ్రామంలో ఏర్పాటు చేసిన ధాన్యం కొనుగోలు కేంద్రాన్ని ఆదివారం బీఆర్‌ఎస్ పార్టీ మండల ప్రధాన కార్యదర్శి మర్రి మల్లారెడ్డి, సర్పంచ్ మర్రి సంధ్యతో పాటు పార్టీ నాయకులు సందర్శించి అక్కడి పరిస్థితులను పరిశీలించారు; యార్డులో కొనసాగుతున్న కొనుగోలు ప్రక్రియను సమీక్షిస్తూ రైతులతో మాట్లాడి వారి సమస్యలను తెలుసుకున్నారు. ఈ సందర్భంగా రైతులు తూకం ఆలస్యం, తేమ శాతం కొలతలో ఇబ్బందులు, చెల్లింపుల జాప్యం వంటి సమస్యలను వివరించి, కొనుగోళ్లు సక్రమంగా లేకపోవడంతో రోజుల తరబడి యార్డుల్లో వేచి ఉండాల్సి వస్తోందని ఆవేదన వ్యక్తం చేశారు.

దీనిపై సర్పంచ్ మర్రి సంధ్య మాట్లాడుతూ రైతులు ఇబ్బందులు పడకుండా కొనుగోలు ప్రక్రియను వేగవంతం చేయాలని, తూకం, తేమ శాతం విషయంలో ఎటువంటి అన్యాయం జరగకుండా అధికారులు చర్యలు తీసుకోవాలని కోరారు. బీఆర్‌ఎస్ ప్రధాన కార్యదర్శి మర్రి మల్లారెడ్డి మాట్లాడుతూ కాటా పెట్టిన ధాన్యాన్ని ఆలస్యం చేయకుండా వెంటనే లోడ్ చేసి మిల్లర్లకు తరలించాలని, యార్డుల్లో ధాన్యం పేరుకుపోకుండా కొనుగోళ్లు వేగంగా జరగాలని, జరుగుతున్న ఆలస్యాలను అధికారులు వెంటనే సరిదిద్దాలని సూచించారు;

కొనుగోలు కేంద్రాల్లో పారదర్శకతతో పనులు నిర్వహించి రైతులకు ఎటువంటి ఇబ్బందులు కలగకుండా చూడాలని కోరుతూ, తక్షణమే ప్రభుత్వం స్పందించి ధాన్యం కొనుగోళ్లు చేపట్టాలని, లేని పక్షంలో బీఆర్‌ఎస్ పార్టీ ఆధ్వర్యంలో ఆందోళనలు చేపడతామని హెచ్చరించారు. సరైన నిల్వ సదుపాయాలు లేకపోవడం, కొనుగోలు ప్రక్రియ ఆలస్యమవడం రైతుల ఇబ్బందులను మరింత పెంచుతుండగా, తడిసిన ధాన్యాన్ని రక్షించే చర్యలు తీసుకుని నష్టపోయిన రైతులకు తగిన పరిహారం అందించాలని బాధితులు విజ్ఞప్తి చేస్తున్నారు.