శ్రీనగర్: జమ్మూకాశ్మీర్‌ శ్రీనగర్‌లోని నౌగామ్ పోలీస్ స్టేషన్‌లో ప్రమాదవశాత్తు జరిగిన పేలుడులో తొమ్మిది మంది మృతి చెందగా, 27 మంది గాయపడ్డారు. ఫరీదాబాద్ 'వైట్-కాలర్' టెర్రర్ మాడ్యూల్ కేసులో స్వాధీనం చేసుకున్న పెద్ద పేలుడు పదార్థాల నిల్వ నుండి అధికారులు నమూనాలను తీస్తుండగా ఈ పేలుడు సంభవించిందని అధికారులు శనివారం తెలిపారు. అధికారులు తెలిపిన వివరాల ప్రకారం... శుక్రవారం రాత్రి ఈ పేలుడు సంభవించింది. తొమ్మిది మంది మరణించారు. 27 మంది గాయపడ్డారు. మృతుల్లో ఎక్కువగా పోలీసులు, ఫోరెన్సిక్ అధికారులు ఉన్నారు. పేలుడు జరిగిన ప్రదేశం నుండి ఇప్పటివరకు ఎనిమిది మృతదేహాలను వెలికితీశారు.

గాయపడిన వారిని శ్రీనగర్‌లోని వివిధ ఆసుపత్రులకు తరలించామని, మృతులను గుర్తించడానికి ప్రయత్నాలు కొనసాగుతున్నాయని అధికారులు తెలిపారు. క్షతగాత్రుల పరిస్థితి విషమంగా ఉండటంతో మృతుల సంఖ్య పెరిగే అవకాశం ఉందని అధికార వర్గాలు తెలిపాయి. శిథిలాల కింద చిక్కుకున్న వారి కోసం సహాయక సిబ్బంది గాలింపు చర్యలు కొనసాగిస్తున్నారు. పేలుడు తీవ్రత భారీగా ఉండటంతో ఘటనా స్థలం నుంచి 300 అడుగుల దూరంలో శరీర భాగాలు కనిపించాయని దర్యాప్తు అధికారులు తెలిపారు. పోలీసులు, ఫోరెన్సిక్ బృందాలు ఫరీదాబాద్ నుండి తీసుకువచ్చిన పేలుడు పదార్థాలను నిర్వహిస్తుండగా పేలుడు సంభవించింది. టెర్రర్ మాడ్యూల్ కేసు నుండి స్వాధీనం చేసుకున్న 350 కిలోల స్టాక్‌లో ఎక్కువ భాగం పోలీస్ స్టేషన్ లోపల నిల్వ చేయబడింది. అక్కడే ఎఫ్‌ఐఆర్ నమోదు చేయబడింది.