1. ఏటా 6.17 శాతం వృద్ధి.. 20వ ఈపీఎస్ సర్వేలో వెల్లడి 
2. 2023 మార్చి నాటికి 15,751 మెగావాట్ల స్థాపిత సామర్థ్యం 
3. 2031 నాటికి 1,20,549 మిలియన్ యూనిట్లు అవసరం 
4. గరిష్ఠ డిమాండ్ 27,059 మెగావాట్లకు చేరుకుంటుందని అంచనా

హైదరాబాద్, ఆగస్టు 13 (విజయ క్రాంతి): తెలంగాణలో విద్యుత్ డిమాండ్ ఏటా 6.17 శాతం వృద్ధి నమోదవుతుందని కేంద్ర విద్యుత్తు శాఖ అంచనా వేసింది. 2023 నుంచి 2031 మధ్య కాలంలో ఈ వృద్ధి ఉంటుందని తాజాగా సెంట్రల్ ఎలక్ట్రీసిటీ అథారిటీ (సీఈఏ)ఆధ్వర్యంలో చేసిన 20వ ఈపీఎస్ సర్వేలో స్పష్టం చేసింది. ఇందుకు అనుగుణంగా విద్యుత్ స్థాపిత సామర్థ్యాన్ని కూడా ఎలా పెంచుకోవాలనేదానిపై సర్వేలో పొందుపర్చారు. 

ఈపీఎస్ సర్వేలోని విశేషాలు..

1. ప్రస్తుతం (2023 మార్చి ౩1 నాటికి) తెలంగాణలో 15,751 మెగావాట్ల స్థాపిత సామర్థ్యం ఉంది. ఇందులో 48 శాతం థర్మల్, మరో 52 శాతం న్యూక్లియర్, బయోమాస్, హైడ్రో, విండ్, సోలార్ విద్యుత్తు ద్వారా ఉత్పత్తి అవుతుంది. 
2. 2031 నాటికి రాష్ట్రంలో గరిష్ఠ విద్యుత్ డిమాండ్ 27,౦59 మెగావాట్లకు చేరుకునే అవకాశం ఉంది. 
3. 2023 రాష్ట్రంలో విద్యుత్ వినియోగం 77,503 మిలియన్ యూనిట్లు ఉండగా.. 2031 నాటికి 1,20,549 మిలియన్ యూనిట్లకు చేరుకుంటుంది. 
4. ఏటా సగటున 6.17 శాతంతో విద్యుత్ వినియోగం వృద్ధి నమోదవుతుంది.  
5. డిమాండ్‌ను అందుకోవాలంటే.. 2029 నాటికి పవన విద్యుత్తు ద్వారా అదనంగా 7,701 మిలియన్ యూనిట్లు, జల విద్యుత్తు ద్వారా 3,129 మిలియన్ యూనిట్లు, ఇతర మార్గాల ద్వారా 37,253 మిలియన్ యూనిట్లు ఉత్పత్తి చేయడం లేదా సమీకరించాలి.  
6. ప్రణాళికాబద్ధంగా స్థాపిత సామర్థ్యాన్ని పెంచుతూ పోయినా 2031 నాటికి సుమారు 7,027 మిలియన్ యూనిట్ల విద్యుత్తును అందించలేకపోవచ్చు. 
7. 2031 నాటికి డిమాండ్‌కు తగిన ట్టుగా విద్యుత్ ఉత్పత్తి చేయాలంటే.. థర్మల్ విద్యుత్ స్థాపిత సామర్థ్యం 14,191 మెగావాట్లకు, సోలార్ విద్యుత్ 19,345 మెగావాట్లకు, పవన విద్యుత్తు 4,718 మెగావాట్లకు, జల విద్యుత్తు 4,102 మెగావాట్లకు చేరుకోవాలి.  
8. సౌర విద్యుదుత్పత్తిలో మంచి ప్రగతి సాధించడంతో 2031 నాటికి థర్మల్ విద్యుత్ పీఎల్‌ఎఫ్ 50.7 శాతం ఉండే అవకాశం ఉంది.