అర్పోరా: ఉత్తర గోవాలోని అర్పోరాలోని ఒక రెస్టారెంట్‌లో జరిగిన అగ్నిప్రమాదానికి(Goa club fire incident) సంబంధించి అరెస్టు చేసిన ముగ్గురు జనరల్ మేనేజర్లు, ఒక బార్ మేనేజర్ సహా నలుగురిని స్థానిక కోర్టు రాష్ట్ర పోలీసుల కస్టడీకి అప్పగించింది. ఆదివారం తెల్లవారుజామున చెలరేగిన మంటల్లో కనీసం 25 మంది ప్రాణాలు కోల్పోయారు. వారిలో నలుగురు పర్యాటకులుగా, మరో 14 మంది రెస్టారెంట్ సిబ్బందిగా గుర్తించారు. అత్యవసర బృందాలు సంఘటనా స్థలానికి చేరుకుని, గాయపడిన వారిని చికిత్స కోసం సమీపంలోని ఆసుపత్రులకు తరలించారు. అధికారులు రాత్రంతా శ్రమించి పరిస్థితిని అదుపులోకి తెచ్చారు.

అరెస్టయిన వారిలో న్యూఢిల్లీలోని ఆర్‌కె పురం నివాసి రాజీవ్ మోదక్, 49, చీఫ్ జనరల్ మేనేజర్; ప్రియాంషు ఠాకూర్, 32, గేట్ మేనేజర్, మాల్వియా నగర్, న్యూఢిల్లీ; ఉత్తరప్రదేశ్‌లోని గోరఖ్‌పూర్‌కు చెందిన రాజ్‌వీర్ సింఘానియా, 32, బార్ మేనేజర్; వివేక్ సింగ్, 27, జనరల్ మేనేజర్, ఉత్తరప్రదేశ్‌లోని జౌన్‌పూర్‌కు చెందినవారు. యజమానులు సౌరవ్ లూత్రా, గౌరవ్ లూత్రాపై ఎఫ్ఐఆర్ నమోదు చేసినట్లు గోవా డైరెక్టర్ జనరల్ ఆఫ్ పోలీస్ (డిజిపి) అలోక్ కుమార్ తెలిపారు. గోవా పోలీసులు తెలిపిన వివరాల ప్రకారం, మొత్తం 25 మృతదేహాలను జీఎంసీ బాంబోలిమ్‌కు తరలించారు. మృతదేహాలను గుర్తించే ప్రక్రియ కొనసాగుతోంది. వీలైనంత త్వరగా గుర్తింపులను నిర్ధారించడానికి అన్ని ప్రయత్నాలు జరుగుతున్నాయి. గాయపడిన ఆరుగురిలో ఒకరిని డిశ్చార్జ్ చేశారు. ఐదుగురు ఇంకా ఆసుపత్రిలో చికిత్స పొందుతున్నారని పోలీసులు తెలిపారు. ఆదివారం, అర్పోరా నైట్‌క్లబ్ అగ్నిప్రమాదంలో 17 మంది బాధితులకు పోస్ట్‌మార్టం పరీక్షలు పూర్తయ్యాయి.