వాషింగ్టన్: అమెరికా మేయర్, గవర్నర్ ఎన్నికల్లో భారత సంతతికి చెందిన నేతలు ఘన విజయం సాధించారు. వర్జీనియా గవర్నర్(Virginia New Lieutenant Governor) గా హైదరాబాదీ మహిళ గజాలా హష్మీ(Ghazala Hashmi) గెలుపొందారు. అమెరికాలో గవర్నర్ గా ఎన్నికైన తొలి ముస్లిం మహిళగా హష్మీ చరిత్ర సృష్టించారు. భారత సంతతికి చెందిన డెమొక్రాట్ గజాలా హష్మీ వర్జీనియా లెఫ్టినెంట్ గవర్నర్ రేసులో రిపబ్లికన్ జాన్ రీడ్‌ను ఓడించి గెలిచారు. హష్మీ 15వ సెనెటోరియల్ జిల్లాకు ప్రాతినిధ్యం వహిస్తున్న వర్జీనియా సెనేట్‌లో పనిచేసిన మొదటి ముస్లిం, దక్షిణాసియా అమెరికన్. ఆమె 2019లో రాజకీయాల్లోకి ప్రవేశించి హష్మీ ఈ  విజయంతో రిపబ్లికన్ పార్టీ ఆధీనంలో ఉన్న రాష్ట్ర సెనేట్ సీటును కైవసం చేసుకుని వర్జీనియా జనరల్ అసెంబ్లీకి ఎన్నికయ్యారు.

2024లో ఆమె సెనేట్ విద్య, ఆరోగ్య కమిటీకి చైర్‌పర్సన్‌గా ఎంపికయ్యారు. 1964లో హైదరాబాద్‌లో జియా హష్మీ, తన్వీర్ హష్మి దంపతులకు జన్మించిన గజాలా హష్మీ తన బాల్యాన్ని మలక్‌పేటలోని తన అమ్మమ్మ తాతామామల ఇంట్లో గడిపింది. ఉమ్మడి ఆంధ్రప్రదేశ్ లో హష్మీ తాత ఆర్థికశాఖలో పనిచేశారు. ఆమె తన తల్లి, అన్నయ్యతో కలిసి భారతదేశం నుండి అమెరికాకు వలస వెళ్ళినప్పుడు ఆమెకు నాలుగు సంవత్సరాలు. అమెరికాలోని జార్జియాలో గజాలా హష్మీ కుటుంబం స్థిరపడింది. గజాలా తండ్రి ప్రొఫెసర్ జియా హష్మి అలీఘర్ ముస్లిం విశ్వవిద్యాలయం పూర్వ విద్యార్థి, అక్కడే ఆయన ఎంఏ, ఎల్ఎల్‌బీ పట్టా పొందారు. ఆయన సౌత్ కరోలినా విశ్వవిద్యాలయం నుండి అంతర్జాతీయ సంబంధాలలో పిహెచ్‌డి పూర్తి చేసి, త్వరలోనే తన విశ్వవిద్యాలయ బోధనా వృత్తిని ప్రారంభించారు. 

ఆయన తాను స్థాపించిన సెంటర్ ఫర్ ఇంటర్నేషనల్ స్టడీస్ డైరెక్టర్‌గా(Director of the Center for International Studies) పదవీ విరమణ చేశారు. హష్మి తల్లి తన్వీర్ హష్మి బి.ఎ, బి.ఎడ్. ఆమె కోఠిలోని ఉస్మానియా విశ్వవిద్యాలయం, మహిళా కళాశాల(koti womens college) నుండి చదువుకుంది. హష్మీ తన ఉన్నత పాఠశాల తరగతిలో వాలెడిక్టోరియన్‌గా పట్టభద్రురాలైంది. ఆమె జార్జియా సదరన్ యూనివర్సిటీ నుండి బి.ఎ. ఆనర్స్ డిగ్రీని,  అట్లాంటాలోని ఎమోరీ యూనివర్సిటీ నుండి అమెరికన్ సాహిత్యంలో పిహెచ్‌డిని సంపాదించింది. 1991లో, హష్మీ తన భర్త అజార్ రఫీక్‌తో కలిసి రిచ్‌మండ్ ప్రాంతానికి వెళ్లారు. ఈ దంపతులకు యాస్మిన్  నూర్ అనే ఇద్దరు కుమార్తెలు ఉన్నారు. వీరిద్దరూ చెస్టర్‌ఫీల్డ్ కౌంటీ పబ్లిక్ స్కూల్స్ , వర్జీనియా విశ్వవిద్యాలయం నుండి పట్టభద్రులయ్యారు. హష్మీ దాదాపు 30 సంవత్సరాలు ప్రొఫెసర్‌గా పనిచేశారు. మొదట రిచ్‌మండ్ విశ్వవిద్యాలయంలో తరువాత రేనాల్డ్స్ కమ్యూనిటీ కళాశాలలో బోధించారు. రేనాల్డ్స్ కమ్యూనిటీ కళాశాలలో, హష్మీ సెంటర్ ఫర్ ఎక్సలెన్స్ ఇన్ టీచింగ్ అండ్ లెర్నింగ్ (Center for Excellence in Teaching and Learning) వ్యవస్థాపక డైరెక్టర్‌గా కూడా పనిచేశారు.