హైదరాబాద్: సౌర, పవన విద్యుత్ ప్లాంట్లు, పంప్డ్ స్టోరేజ్ ప్రాజెక్టులు (PSP), బ్యాటరీ ఎనర్జీ స్టోరేజ్ సిస్టమ్స్ (Battery Energy Storage System) వంటి పునరుత్పాదక ఇంధన ప్రాజెక్టులను అమలు చేయడంలో తెలంగాణ ప్రభుత్వాన్ని అత్యవసరంగా పరిశీలించి, మద్దతు ఇవ్వాలని కేంద్ర బొగ్గు మంత్రి జి. కిషన్ రెడ్డి కోరారు. ఈ కార్యక్రమాలు రాబోయే మూడు సంవత్సరాలలో రూ.10,000 కోట్ల పెట్టుబడులను ఆకర్షించగలవని ఆయన అన్నారు. బొగ్గు మంత్రిత్వ శాఖ పరిధిలోని కేంద్ర ప్రభుత్వ రంగ సంస్థలు (CPSUలు), ముఖ్యంగా కోల్ ఇండియా లిమిటెడ్ (CIL), NLC ఇండియా లిమిటెడ్ (NLCIL) తెలంగాణ ప్రభుత్వంతో గణనీయమైన పునరుత్పాదక ఇంధన ప్రాజెక్టులను అమలు చేయడంలో భాగస్వామ్యం కావడానికి బలమైన నిబద్ధతను వ్యక్తం చేశాయి.

తెలంగాణ ముఖ్యమంత్రి రేవంత్(CM Revanth Reddy) రెడ్డికి కేంద్రమంత్రి కిషన్ రెడ్డి(Union Minister Kishan Reddy) బహిరంగ లేఖ రాశారు. పునరుత్పాదక ఇంధన కార్యక్రమాలపై ప్రభుత్వ సహకారం కోరుతున్నట్లు లేఖలో పేర్కొన్నారు. అధిక సౌరవిద్యుత్పత్తి సామర్థ్యం ఉన్న జోన్ లు గుర్తించి ప్లాంట్లు ఏర్పాటు చేయాలని కిషన్ రెడ్డి పేర్కొన్నారు. గ్రిడ్ స్టెబిలిటీ, ఎనర్జీ రిలయబిలిటీలు పెంచేలా బీఈఎస్ఎస్ ను అభివృద్ధి చేయాలన్నారు. పంప్డ్ స్టోరేజ్ ప్రాజెక్టుల ఏర్పాటుకు సాధ్యాసాధ్యాల అధ్యయనం చేయాలని సూచించారు. ప్రాజెక్టులకు భూసేకరణ, భూ కేటాయింపు కోసం ప్రభుత్వ(Telangana Government) మద్దతు అవసరాన్ని ఆయన నొక్కిచెప్పారు.