సూడాన్‌: ఆఫ్రికా దేశం పశ్చిమ సూడాన్‌లోని మారుమూల మర్రా పర్వతాలలో కొండచరియలు విరిగిపడి కనీసం 1,000 మందికిపైగా మరణించారని తిరుగుబాటు సంస్థ ది సుడాన్ లిబరేషన్ మూవ్‌మెంట్/ఆర్మీ తెలిపింది. రోజుల తరబడి కురిసిన భారీ వర్షం కారణంగా కొండచరియలు విరిగిపడ్డాయి. కొండచరియలు విరిగిపడి ఓ గ్రామం తుడిచిపెట్టుకుపోయింది. ఈ దుర్ఘటనలో ఒక్కరు మాత్రమే ప్రాణాలతో బయటపడ్డారని, తరాసిన్ గ్రామంలో ఎక్కువ భాగం చదును అయిందని ఆ బృందం ఒక ప్రకటనలో తెలిపింది. ఆఫ్రికా దేశం ఇప్పుడు ఐక్యరాజ్యసమితి, ఇతర ప్రాంతీయ,అంతర్జాతీయ సంస్థల నుండి మానవతా సహాయం కోసం విజ్ఞప్తి చేసింది. సూడాన్ సైన్యం, పారామిలిటరీ రాపిడ్ సపోర్ట్ ఫోర్సెస్ (Rapid Support Forces) మధ్య జరిగిన యుద్ధం తరువాత, ఉత్తర డార్ఫర్ రాష్ట్రానికి చెందిన చాలా మంది నివాసితులు మర్రా పర్వత ప్రాంతంలో ఆశ్రయం పొందారు. 

ఏప్రిల్ 2023లో సూడాన్ సైన్యం(Sudanese Armed Forces), ఆర్‌ఎస్‌ఎఫ్ మధ్య జరిగిన అంతర్యుద్ధం దేశాన్ని కరువులోకి నెట్టింది. పశ్చిమ డార్ఫర్ ప్రాంతంలో(West Darfur region) మారణహోమం ఆరోపణలు ఎదుర్కొంటోంది. అంతర్యుద్ధంలో మృతుల సంఖ్య అంచనాలు గణనీయంగా మారుతూ ఉంటాయి. కానీ 2023లో శత్రుత్వం ప్రారంభమైనప్పటి నుండి 150,000 మంది వరకు మరణించారని గత సంవత్సరం ఒక యుఎస్ అధికారి(US official) అంచనా వేశారు. దాదాపు 12 మిలియన్ల మంది తమ ఇళ్లను వదిలి పారిపోయారు. కొండచరియలు విరిగిపడిన ప్రాంతాన్ని నియంత్రించే సూడాన్ లిబరేషన్ మూవ్‌మెంట్/ఆర్మీ వర్గాలు, ఆర్ఎస్ఎఫ్ కి వ్యతిరేకంగా సూడాన్ సైన్యంతో కలిసి పోరాడతామని ప్రతిజ్ఞ చేశాయి. జాతిపరంగా మిశ్రమ ప్రాంతాన్ని అరబ్ పాలనలో ఉన్న ప్రాంతంగా మార్చే లక్ష్యంతో ఆర్‌ఎస్‌ఎఫ్, అనుబంధ మిలీషియాలు యుద్ధం చేశాయని చాలా మంది డార్ఫురీలు విశ్వసిస్తున్నారు.