న్యూఢిల్లీ: ప్రధానమంత్రి నరేంద్ర మోదీకి(Narendra Modi) గురువారం ఘనా జాతీయ గౌరవం ''ది ఆఫీసర్ ఆఫ్ ది ఆర్డర్ ఆఫ్ ది స్టార్ ఆఫ్ ఘనా''(Officer of the Order of the Star) ప్రదానం చేశారు. ఆయన విశిష్ట రాజనీతిజ్ఞత, ప్రభావవంతమైన ప్రపంచ నాయకత్వానికి గుర్తింపుగా ఈ పురస్కారం లభించింది. ప్రధాని మోదీ పశ్చిమ ఆఫ్రికా దేశ పర్యటన సందర్భంగా అధ్యక్షుడు జాన్ ద్రమానీ మహామా(Ghana President John Mahama) ఈ ప్రతిష్టాత్మక అవార్డును ప్రదానం చేశారు. కృతజ్ఞత తెలుపుతూ, ప్రధాని మోదీ ఎక్స్ లో "‘ది ఆఫీసర్ ఆఫ్ ది ఆర్డర్ ఆఫ్ ది స్టార్ ఆఫ్ ఘనా’ అవార్డును ప్రదానం చేయడం గౌరవంగా భావిస్తున్నాను" అని పోస్ట్ చేశారు. తన అంగీకార ప్రసంగంలో ప్రధానమంత్రి ఈ గౌరవం కేవలం వ్యక్తిగత విజయం కాదని, 140 కోట్ల మంది భారతీయుల తరపున తాను స్వీకరించానని తెలిపారు. ఆయన ఈ అవార్డును దేశ యువతకు, దాని గొప్ప సాంస్కృతిక వారసత్వానికి, భారతదేశం, ఘనా మధ్య శాశ్వత సంబంధాలకు అంకితం చేశారు. 

రెండు దేశాల మధ్య సన్నిహిత పెరుగుతున్న సంబంధానికి చిహ్నంగా ఈ గౌరవాన్ని విదేశాంగ మంత్రిత్వ శాఖ (Ministry of External Affairs) అభివర్ణించింది. ఈ గుర్తింపుకు ఘనా ప్రభుత్వానికి, ప్రజలకు మోడీ కృతజ్ఞతలు తెలిపారు. ఉమ్మడి ప్రజాస్వామ్య విలువలు, సంప్రదాయాలు రెండు దేశాల మధ్య భాగస్వామ్యాన్ని మార్గనిర్దేశం చేస్తూ బలోపేతం చేస్తూనే ఉంటాయని పేర్కొన్నారు. ఈ అవార్డు భారతదేశం, ఘనా మధ్య స్నేహాన్ని మరింతగా పెంచుతూ ద్వైపాక్షిక సంబంధాలను మెరుగుపరచుకోవడానికి తనపై కొత్త బాధ్యతను ఉంచుతుందన్నారు. తన చారిత్రక పర్యటన భారతదేశం-ఘనా సంబంధాలకు కొత్త ఊపును ఇస్తుందని మోడీ విశ్వాసం వ్యక్తం చేశారు. అంతకుముందు రోజు, ఇద్దరు నాయకులు విస్తృత చర్చలు జరిపారు. ద్వైపాక్షిక సంబంధాన్ని సమగ్ర భాగస్వామ్యానికి పెంచాలని నిర్ణయించారు. ప్రధానమంత్రి మోడీ పర్యటన మూడు దశాబ్దాల తర్వాత భారతదేశం నుండి ఘనాకు జరిగిన మొదటి ప్రధానమంత్రి పర్యటనను సూచిస్తుంది. ఆయన ఐదు దేశాల పర్యటనలో భాగంగా ఇది జరుగుతుంది.