బాలి: ఇండోనేషియాలోని బాలి ద్వీపం(Bali Island) సమీపంలో 65 మందితో ప్రయాణిస్తున్న ఫెర్రీ(Ferry Sinks) మునిగిపోవడంతో నలుగురు మరణించగా, 38 మంది గల్లంతయ్యారని, 23 మంది ప్రాణాలతో బయటపడ్డారని ఆ దేశ సెర్చ్ అండ్ రెస్క్యూ ఏజెన్సీ(Search and Rescue Agency) గురువారం తెలిపింది. ఆ పడవలో 53 మంది ప్రయాణికులు, 12 మంది సిబ్బంది, 22 వాహనాలు ఉన్నాయని ఆ సంస్థ తెలిపింది. గల్లంతైన వారి కోసం గాలింపు చర్యలు కొనసాగుతున్నాయని, బలమైన ప్రవాహాలు, గాలుల కారణంగా దీనికి ఆటంకం ఏర్పడుతుందని బన్యువాంగి పోలీసు చీఫ్ రామ సమతమ పుత్ర తెలిపారు. 17,000 కంటే ఎక్కువ దీవులతో కూడిన విస్తారమైన ద్వీపసమూహం అయిన ఇండోనేషియాలో ఫెర్రీలు విస్తృతంగా ఉపయోగించబడుతున్నాయి. అయితే అధిక రద్దీ, సరైన ప్రాణాలను రక్షించే పరికరాలు లేకపోవడం వంటి పేలవమైన భద్రతా పద్ధతుల కారణంగా ప్రమాదాలు తరచుగా జరుగుతున్నాయి. 2023లో, సులవేసి ద్వీపం సమీపంలో ఒక చిన్న ఫెర్రీ బోల్తా పడిన ఘటనలో కనీసం 15 మంది మరణించారు.

సౌదీ అరేబియా పర్యటనలో(Saudi Arabia trip) ఉన్న అధ్యక్షుడు ప్రబోవో సుబియాంటో తక్షణ అత్యవసర ప్రతిస్పందనను ఆదేశించారని క్యాబినెట్ కార్యదర్శి టెడ్డీ ఇంద్ర విజయ గురువారం ఒక ప్రకటనలో తెలిపారు. ప్రమాదానికి  చెడు వాతావరణ పరిస్థితులే కారణమని పేర్కొన్నారు. జావాకు చెందిన సురబయ సెర్చ్ అండ్ రెస్క్యూ ఏజెన్సీ అధిపతి నానాంగ్ సిగిట్ ఒక ప్రకటనలో అదే గణాంకాలను ధృవీకరించారు. ప్రతికూల వాతావరణ పరిస్థితుల కారణంగా పడవను చేరుకోవడానికి ప్రయత్నాలు మొదట్లో ఆటంకం కలిగించాయని, ఆ తర్వాత అది కాస్త తగ్గిందని అన్నారు. బలమైన గాలులు, ప్రవాహాలతో 2.5 మీటర్ల (8 అడుగులు) ఎత్తులో అలలు ఎగసిపడటం వలన సహాయక చర్యలకు ఆటంకం కలిగిందని వెల్లడించారు.