న్యూఢిల్లీ: భారతదేశం 10 కొత్త అణు రియాక్టర్లపై(,PM Modi nuclear reactors) వేగంగా పని చేస్తోందని, తన అణుశక్తి సామర్థ్యాన్ని పదిరెట్లు పెంచుతామని ప్రతిజ్ఞ చేసిందని ప్రధానమంత్రి నరేంద్ర మోడీ శుక్రవారం అన్నారు. స్వాతంత్య్ర దినోత్సవం(Independence Day 2025) నాడు ఎర్రకోటపై నుంచి జాతిని ఉద్దేశించి ప్రసంగించిన ఆయన, భవిష్యత్తు ఇంధన అవసరాలను దృష్టిలో ఉంచుకుని భారతదేశం అణుశక్తి రంగంలో ప్రధాన చొరవలు తీసుకుంటోందని అన్నారు. "10 కొత్త అణు రియాక్టర్ల పనులు వేగంగా జరుగుతున్నాయి. 2047 నాటికి, మా అణుశక్తి సామర్థ్యాన్ని పది రెట్లు పెంచుతామని మేము ప్రతిజ్ఞ చేసాము... అణుశక్తి రంగంలో మేము ప్రధాన సంస్కరణలను తీసుకువస్తున్నాము" అని ప్రధాని(PM Modi speech) తెలిపారు. ఇంధన రంగంలో, పెట్రోల్, డీజిల్, గ్యాస్ వంటి ఇంధన అవసరాల కోసం మనం అనేక దేశాలపై ఎక్కువగా ఆధారపడుతున్నామని మనందరికీ తెలుసన్నారు.

వాటిని దిగుమతి చేసుకోవడానికి మనం బిలియన్ల రూపాయలు ఖర్చు చేయాల్సి వస్తుందని చెప్పారు. ఈ విషయంలో దేశాన్ని స్వావలంబన చేయడం చాలా ముఖ్యమన్నారు. గత 11 సంవత్సరాలలో సౌరశక్తి సామర్థ్యం 30 రెట్లు పెరిగిందన్నారు. జల విద్యుత్తును విస్తరించడానికి, స్వచ్ఛమైన శక్తిని అందుబాటులోకి తీసుకురావడానికి తాము కొత్త ఆనకట్టలను నిర్మిస్తున్నామని పేర్కొన్నారు. హైడ్రోజన్ మిషన్‌లో భారతదేశం వేల కోట్ల రూపాయలను పెట్టుబడి పెడుతోందని ప్రధాని నరేంద్ర మోదీ సూచించారు. కీలక ఖనిజాల కోసం 1200 ప్రాంతాల్లో పరిశోధనలు జరుగుతున్నాయని చెప్పిన ప్రధాని తనకు యువత శక్తి, సామర్థ్యాలపై నమ్మకం ఉందన్నారు. ఫైటర్‌ జెట్లకు మేడిన్‌ ఇండియా ఇంజిన్లపై దృష్టిపెడతామని వెల్లడించారు. గ్రీన్‌ హైడ్రోజన్‌ ప్రాజెక్టులను ముందుకు తీసుకెళ్తున్నామన్నారు. త్వరలో మేడిన్‌ ఇండియాచిప్స్‌ మార్కెట్‌లో రాజ్యమేలుతాయని తెలిపారు.