న్యూఢిల్లీ: దీపావళి నాటికి వస్తువులు,సేవల పన్ను (Goods and Services Tax)లో తదుపరి తరం సంస్కరణలు ఆవిష్కృతమవుతాయని, ఇది సామాన్యులకు గణనీయమైన పన్ను ఉపశమనం కల్పిస్తుందని, చిన్న, మధ్య తరహా పరిశ్రమలకు ప్రయోజనం చేకూరుస్తుందని ప్రధానమంత్రి నరేంద్ర మోడీ(Prime Minister Modi) శుక్రవారం అన్నారు. 79వ స్వాతంత్య్ర దినోత్సవం(Independence Day 2025) సందర్భంగా జాతినుద్దేశించి ప్రసంగించిన ప్రధాని మోదీ, పరోక్ష పన్నుల విధానం 8 సంవత్సరాలు పూర్తి చేసుకున్నందున జిఎస్‌టిలో సంస్కరణలు చేపట్టాల్సిన సమయం ఆసన్నమైందని తెలిపారు.

అనేక పన్నులు, స్థానిక సుంకాలను కలిపిన జిఎస్‌టి జూలై 1, 2017న అమల్లోకి వచ్చింది. "మేము రాష్ట్రాలతో చర్చించాము. దీపావళి(PM Modi Diwali Gift) నాటికి తదుపరి తరం జిఎస్‌టి సంస్కరణలను ప్రారంభిస్తాము, ఇది పౌరులకు దీపావళి బహుమతి అవుతుంది. సామాన్యుల వస్తువులపై పన్ను గణనీయంగా తగ్గుతుంది. మన MSMEలు భారీగా ప్రయోజనం పొందుతాయి. రోజువారీ వినియోగ వస్తువులు చౌకగా మారతాయి. ఇది మన ఆర్థిక వ్యవస్థను కూడా బలోపేతం చేస్తుంది" అని మోడీ ఎర్రకోట ప్రసంగంలో అన్నారు. రాష్ట్రాల ఆర్థిక మంత్రులతో కూడిన మంత్రుల బృందం (Group of Ministers) ఇప్పటికే జిఎస్‌టిలో రేటు హేతుబద్ధీకరణ, స్లాబ్‌ల తగ్గింపు గురించి చర్చిస్తోందని నరేంద్ర మోదీ పేర్కొన్నారు.