హైదరాబాద్: తెలంగాణ రాష్ట్రంలో నేటి నుంచి మూడ్రోజుల పాటు వర్షాలు పడనున్నాయి. ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశముందని వాతావరణ శాఖ పేర్కొంది. తేలికపాటి నుంచి ఓ మోస్తారు వర్షాలు కురిసే అవకాశముందని అధికారులు తెలిపారు. భారత వాతావరణ శాఖ (India Meteorological Department) గురువారం తెలంగాణలోని జిల్లాల్లో భారీ వర్షపాతం హెచ్చరిక జారీ చేసింది.

ఐఎండీ బులెటిన్ ప్రకారం, వికారాబాద్, సంగారెడ్డి, మెదక్, కామారెడ్డి, హైదరాబాద్ జిల్లాల్లోని కొన్ని ప్రదేశాలలో భారీ వర్షాలు కురిసే అవకాశం ఉంది. అదనంగా, రాష్ట్రంలోని 33 జిల్లాల్లోనూ ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉంది. రాబోయే 24 గంటలు హైదరాబాద్, దాని పరిసర ప్రాంతాలలో సాధారణంగా ఆకాశం మేఘావృతమై ఉంటుంది. నగరంలోని కొన్ని ప్రాంతాల్లో మోస్తరు నుండి భారీ వర్షం లేదా ఈదురుగాలులతో కూడిన వర్షాలు కురిసే అవకాశం ఉంది. ఉదయం వేళల్లో పొగమంచుతో కూడిన పరిస్థితులు ఏర్పడే అవకాశం ఉందని అధికారులు పేర్కొన్నారు. నగరంలో భారీ వర్షాలు కురిసే అవకాశమున్నందున ప్రజలు అప్రమత్తంగా ఉండాలని అధికారులు హెచ్చరించారు.