హైదరాబాద్: తెలంగాణలోని ఆడబిడ్డలకు ముఖ్యమంత్రి రేవంత్ రెడ్డి సోమవారం హృదయపూర్వక సద్దుల బతుకమ్మ పండుగ  శుభాకాంక్షలు తెలిపారు. సద్దుల బతుకమ్మ సందర్భంగా తెలంగాణ ప్రకృతిని, పువ్వులను పూజించే గొప్ప సంస్కృతిని కలిగి ఉందని ఆయన పేర్కొన్నారు. "తెలంగాణ ప్రజల సమిష్టి జీవన విధానానికి, కష్టాలను, ఆనందాలను కలిసి పంచుకునే ప్రజల ఐక్యతకు ఈ పండుగ నిదర్శనం" అని ఆయన అన్నారు.

ప్రజల ఐక్యత సాంస్కృతిక వైభవాన్ని ప్రదర్శించడమే కాకుండా, సద్దుల బతుకమ్మ అనేక సామాజిక అంశాలను కూడా ప్రతిబింబిస్తుంది. తొమ్మిది రోజుల పాటు వైభవంగా, ఉత్సాహంగా జరుపుకునే ఈ పండుగ ప్రజల ఆత్మగౌరవాన్ని, ముఖ్యంగా మహిళల ఆత్మగౌరవాన్ని సూచిస్తుందని రేవంత్ రెడ్డి కొనియాడారు. బతుకమ్మ విశిష్టతను ప్రపంచం ముందు ప్రదర్శించడానికి, రాష్ట్ర ప్రభుత్వం సరూర్‌నగర్ స్టేడియంలో 66.5 అడుగుల ఎత్తులో భారీ బతుకమ్మను ఏర్పాటు చేసి 10,000 మంది మహిళలతో ఘనంగా వేడుకలను నిర్వహిస్తున్నట్లు రేవంత్ రెడ్డి తెలిపారు.

చెరువులు, సరస్సులను సంరక్షించడం, వారసత్వాన్ని కొనసాగించడానికి భవిష్యత్ తరాలకు వాటిని బహుమతిగా ఇవ్వడం లక్ష్యంగా ప్రకృతి పరిరక్షణకు ప్రజా ప్రభుత్వం ప్రాధాన్యత ఇచ్చిందని ముఖ్యమంత్రి గుర్తు చేశారు. బతుకమ్మ కుంటల పునరుద్ధరణ సహజ వనరుల పరిరక్షణలో భాగమని రేవంత్ రెడ్డి స్పష్టం చేశారు. ఇదిలా ఉండగా సరూర్‌నగర్ స్టేడియంలో ఏర్పాటు చేసిన 66.5 అడుగుల మెగా బతుకమ్మ గిన్నిస్ రికార్డు సాధించింది. ఈ మేరకు గిన్నిస్ బుక్ ఆఫ్ రికార్డ్స్ ప్రతినిధులు ప్రకటించారు. ఈ వేడుకల్లో మంత్రులు సీతక్క, కొండా సురేఖ సహ పలువురు మహిళా ప్రజాప్రతినిధులు పాల్గొన్నారు.