హైదరాబాద్: ఫోన్ ట్యాపింగ్ కేసును దర్యాప్తు చేస్తున్న ప్రత్యేక దర్యాప్తు బృందం (Special Investigation Team) సంచలనాత్మక పరిణామంలో మాజీ ముఖ్యమంత్రి, బీఆర్ఎస్ అధ్యక్షుడు కేసీఆర్(Kalvakuntla Chandrashekar Rao) ను శుక్రవారం ఈ కేసు విషయంలో విచారించేందుకు గురువారం నోటీసులు జారీ చేసింది. నంది నగర్‌లోని కేసీఆర్ నివాసంలో ఆయన పీఏకు సిట్ నోటీసులిచ్చారు. ఫోన్ ట్యాపింగ్ కేసులో రేపు కేసీఆర్ విచారణకు రావాలని సిట్ నోటీసుల్లో పేర్కొన్నారు. కేసీఆర్‌ విచారణకు సిద్ధంగా ఉండాలని సిట్ అధికారులు సూచించారు. 65ఏళ్లు పైబడిన వ్యక్తులు విచారణ కోసం పోలీస్ స్టేషన్ కు పిలవకూడదనే నిబంధన ఉంది. ఇబ్బంది లేకపోతే జూబ్లీహిల్స్ పీఎస్ కు విచారణకు రావచ్చని కేసీఆర్ కు సిట్ సూచించింది.

పీఎస్ కు రాలేనట్లయితే అనువైన ప్రదేశాన్ని సూచించవచ్చని సిట్ అధికారులు కేసీఆర్ కు తెలిపారు. బీఆర్ఎస్ ప్రభుత్వం కింద అప్పటి స్పెషల్ ఇన్వెస్టిగేషన్ బ్యూరో (SIB) అధికారులు రాజకీయ నాయకులు, ప్రముఖులు, టాలీవుడ్ నటులు, జర్నలిస్టులు, న్యాయమూర్తుల మొబైల్ ఫోన్‌లను ట్యాప్ చేసినట్లు ఆరోపణలున్నాయి. గత శుక్రవారం సిట్ బృందం మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ ను  దాదాపు ఎనిమిది గంటల పాటు విచారించింది. ఎన్నికల బాండ్లతో సహా వివిధ మార్గాల ద్వారా పార్టీకి నిధుల మళ్లింపుపై ఈ విచారణ ప్రధానంగా కేంద్రీకృతమైంది. సీనియర్ నాయకుడు టి. హరీష్ రావును కూడా బుధవారం సిట్ ప్రశ్నించింది.