బీజాపూర్: ఛత్తీస్‌గఢ్‌లోని బీజాపూర్(Bijapur) జిల్లాలో గురువారం భద్రతా బలగాలతో జరిగిన ఎదురుకాల్పుల్లో కనీసం ఇద్దరు మావోయిస్టులు మరణించారని ఒక పోలీసు అధికారి తెలిపారు. జిల్లా దక్షిణ ప్రాంతంలోని అటవీ ప్రాంతంలో డిస్ట్రిక్ట్ రిజర్వ్ గార్డ్ (డీఆర్‌జీ) బృందం నక్సల్ వ్యతిరేక ఆపరేషన్ నిర్వహిస్తున్నప్పుడు ఉదయం 7 గంటల ప్రాంతంలో ఈ కాల్పుల ఘటన చోటుచేసుకుందని చెప్పారు. ఇప్పటివరకు, భద్రతా సిబ్బంది ఎన్‌కౌంటర్ జరిగిన ప్రదేశం నుండి ఇద్దరు మావోయిస్టుల మృతదేహాలతో పాటు, ఒక ఏకే-47 రైఫిల్, ఒక 9 ఎంఎం పిస్టల్, ఇతర ఆయుధాలు, పేలుడు పదార్థాలను స్వాధీనం చేసుకున్నామని ఎస్పీ జితేంద్ర యాదవ్ తెలిపారు.

ఆ ప్రాంతంలో ఆపరేషన్ ఇంకా కొనసాగుతోందని, మరిన్ని వివరాలు తెలియాల్సి ఉందని అధికారులు వెల్లడించారు. ఈ సంవత్సరం ఇప్పటివరకు రాష్ట్రంలో జరిగిన వేర్వేరు ఎన్‌కౌంటర్లలో కనీసం 22 మంది మావోయిస్టులు మరణించారు. జనవరి 3న, బీజాపూర్ సహా ఏడు జిల్లాలతో కూడిన బస్తర్ ప్రాంతంలో జరిగిన రెండు ఎన్‌కౌంటర్లలో పద్నాలుగు మంది మావోయిస్టులు ఎన్ కౌంటర్ అయ్యారు. గత సంవత్సరం, ఛత్తీస్‌గఢ్‌లో భద్రతా బలగాలతో జరిగిన ఎదురుకాల్పుల్లో మొత్తం 285 మంది మావోయిస్టులు మరణించారు. 

వామపక్ష తీవ్రవాదాన్ని నిర్మూలించడానికి కేంద్ర ప్రభుత్వం ఈ ఏడాది మార్చి 31ని గడువుగా నిర్దేశించింది. జనవరి 15న ఛత్తీస్‌గఢ్‌లోని బీజాపూర్ జిల్లాలో 21 మంది మహిళలతో సహా మొత్తం 52 మంది నక్సలైట్లు పోలీసుల ముందు లొంగిపోయారని ఒక సీనియర్ అధికారి తెలిపారు. వారిలో 49 మందిపై కలిపి రూ. 1.41 కోట్లకు పైగా రివార్డు ఉంది. లొంగిపోయిన ఈ కార్యకర్తలు దండకారణ్య స్పెషల్ జోనల్ కమిటీ (డీకేఎస్‌జెడ్సీ), ఆంధ్ర-ఒడిశా సరిహద్దు డివిజన్, మహారాష్ట్రలోని మావోయిస్టుల భమ్రగఢ్ ఏరియా కమిటీలో చురుకుగా పనిచేశారని అధికారులు తెలిపారు.