ఇస్లామాబాద్: పాకిస్థాన్‌లోని ఖైబర్ పఖ్తూన్‌ఖ్వా (కేపీ) ప్రావిన్స్‌లో వివాహ వేడుకల్లో ఆత్మాహుతి దాడి(Suicide bombing) జరగడంతో కనీసం ఆరుగురు మరణించగా, డజనుకు పైగా ప్రజలు గాయపడ్డారని స్థానిక మీడియా శనివారం నివేదించింది. శుక్రవారం రాత్రి డేరా ఇస్మాయిల్ ఖాన్ జిల్లాలో అమన్ (శాంతి) కమిటీ అధిపతి నూర్ ఆలం మెహసూద్ నివాసాన్ని లక్ష్యంగా చేసుకుని ఈ పేలుడు జరిగింది. ఈ ఘటనలో మెహసూద్ కూడా గాయపడ్డారు. వివాహ వేడుక జరుగుతుండగా పేలుడు సంభవించింది. దీంతో వేదిక వద్ద భయాందోళనలు, గందరగోళం నెలకొంది. పేలుడులో అనేక మంది గాయపడ్డారని, వారిని వెంటనే సమీపంలోని ఆసుపత్రులకు తరలించామని ప్రముఖ ప్రసార సంస్థ జియో న్యూస్ తెలిపింది. 

పేలుడు కచ్చితమైన కారణం ఇంకా తెలియలేదని అధికారులు తెలిపారు. అయితే ప్రాథమిక పరిశోధనల ప్రకారం ఇది ఆత్మాహుతి దాడి అని తెలుస్తోంది. బాంబు దాడి చేసిన తర్వాత దాడిదారులు కాల్పులకు పాల్పడ్డారని కూడా పోలీసులు చెప్పారు. దర్యాప్తు బృందాలు, ఫోరెన్సిక్ నిపుణులు దాడి చేసిన వ్యక్తిని గుర్తించడానికి, దాడి వెనుక ఉన్న నెట్‌వర్క్‌ను కనిపెట్టడానికి సాక్ష్యాలను సేకరిస్తూ, చాలా గంటల పాటు సంఘటనా స్థలంలోనే ఉన్నారు. పోలీసులు, భద్రతా అధికారుల ప్రకారం, పేలుడు జరిగిన ప్రదేశం నుండి ఆత్మాహుతి దాడి చేసిన వ్యక్తి తల తెగిపోయింది, బాధితుడి వయస్సు సుమారు 17 సంవత్సరాలు ఉంటుందని భావిస్తున్నారు. ఆ తలను ఫోరెన్సిక్ పరీక్ష కోసం పంపినట్లు అధికారుల వెల్లడించారు.