త్వరలోనే హైదరాబాద్‌ను సందర్శిస్తా

ముఖ్యమంత్రి రేవంత్‌రెడ్డితో ఫాక్స్‌కాన్ చైర్మన్ యంగ్ లియూ

హైదరాబాద్‌లో పెట్టుబడులకు సానుకూలత

తమ అమెరికా, దక్షిణ కొరియా పర్యటన విశేషాలు, 

ఒప్పందాలను వివరించిన మంత్రి శ్రీధర్‌బాబు

హైదరాబాద్, ఆగస్టు 16 (విజయ క్రాంతి): ఫోర్త్ సిటీ ఏర్పాటులో తెలంగాణ రాష్ట్ర ప్రభుత్వ, సీఎం రేవంత్‌రెడ్డి విజన్ అద్భుతంగా ఉందని అంతర్జాతీయ దిగ్గజ పారిశ్రామిక సంస్థ ఫాక్స్ కాన్ చైర్మన్ యంగ్ లియూ అన్నారు. ఇండస్ట్రీ, సర్వీస్ సెక్టార్లతోపాటు అన్ని రంగాల్లో విస్తరించే సత్తా ఉన్న నగరం హైదరాబాద్ అని కితాబిచ్చారు. త్వరలోనే తన బృందంతో కలిసి హైదరా బాద్ నగరాన్ని సందర్శిస్తానని తెలిపారు.

యంగ్ లియూ నేతృత్వంలోని ఫాక్స్‌కాన్ ప్రతినిధి బృందం ఢిల్లీలో సీఎం రేవంత్‌రెడ్డితో ఆయన అధికారిక నివాసంలో శుక్రవారం సమావేశమైంది. హైదరాబాద్ నగరానికి ఉన్న చరిత్ర.. పారిశ్రామిక సంస్థల విస్తరణకు ఉన్న అనుకూలత, అద్భుతమైన వాతావరణ పరిస్థితులను సీఎం రేవంత్‌రెడ్డి ఫాక్స్‌కాన్ బృందానికి వివరించారు. 430 ఏళ్ల కింద పునాది రాయి పడిన హైదరాబాద్ కాలక్రమంలో మూడు నగరాలుగా అభివృద్ధి చెందిన తీరును వివరించారు. ప్రభుత్వాలు మారినా పారిశ్రామిక అభివృద్ధిలో వైరుధ్యాలు లేకపోవడంతోనే హైదరా బాద్ వేగంగా పురోగతి చెందుతోందని అన్నారు.

ఆ అభివృద్ధిని మరింతగా పరుగులు పెట్టించేందుకే తాము ప్రస్తుత ప్రపంచ అవసరాలకు తగినట్టు ఫ్యూచర్ సిటీ పేరుతో నాలుగో నగరానికి (ఫోర్త్‌సిటీ) రూపకల్పన చేస్తున్నామని చెప్పారు. ఫోర్త్‌సిటీలో విద్య, వైద్యం, క్రీడలు, ఎలక్ట్రానిక్స్, ఎలక్ట్రికల్, స్కిల్ డెవలప్‌మెంట్ రూపంలో బహుముఖంగా అభివృద్ధి చేయనున్నామని తెలిపారు. ప్రస్తు త ప్రపంచానికి అవసరమైన స్కిల్స్‌ను యువతకు అందించేందుకు యంగ్ ఇండి యా స్కిల్స్ డెవలప్‌మెంట్ యూనివర్సిటీని ప్రారంభిస్తున్నామని వివరించారు.

నవతరం పరిశ్రమల అవసరాలు, వాటికి అవసరమైన నైపుణ్యాలు, భవిష్యత్తులో ఆయా పరిశ్రమల అసవరాలు తీర్చే మానవ వనరులను అందించేందుకు అవసరమైన సిలబస్ రూపకల్పనలో ప్రముఖ పారిశ్రామికవేత్తలను భాగస్వాములను చేస్తున్నట్టు వివరించారు. అందులో భాగంగానే స్కిల్ యూనివర్సిటీకి ఆనంద్ మహీంద్రాను చైర్మన్‌గా, మరో పారిశ్రామికవేత్త శ్రీనివాస్‌రాజును వైస్ చైర్మన్‌గా నియమించామని తెలిపారు. అంతర్జాతీయ విమానాశ్రయం, ఔటర్ రింగు రోడ్డు (ఓఆర్‌ఆర్), రీజినల్ రింగ్‌రోడ్డు (ఆర్‌ఆర్‌ఆ ర్)తోపాటు హైదరాబాద్‌కు ఉన్న అన్ని అనుకూలతలను వారికి సీఎం వివరించారు. 

ఆకట్టుకునే పారిశ్రామిక విధానాలు

ఫోర్త్‌సిటీ రూపకల్పనలో సీఎం దార్శనికత, పారిశ్రామిక అనుకూల విధానాలు తనను ఎంతగానో ఆకట్టుకున్నాయని ఫాక్స్‌కాన్ చైర్మన్ యంగ్ లియూ అన్నారు. ఫోర్త్ సిటీతోపాటు పారిశ్రామిక అనుకూల విధానాల్లో మీ విజన్ అద్భుతంగా ఉందని సీఎం రేవంత్‌రెడ్డిని అభినందించారు. తాను సాధ్యమైనంత త్వరలోనే హైదరాబాద్‌ను సందర్శిస్తానని తెలిపారు. అంతకుముందే తమ చీఫ్ క్యాంపస్ ఆపరేషన్స్ ఆఫీసర్ క్యాథీ యాంగ్, సంస్థ భారతదేశ ప్రతినిధి వీలీ నేతృత్వంలోని బృందం హైదరాబాద్ వస్తుందని చెప్పారు. భేటీలో రాష్ట్ర ప్రభుత్వ ప్రత్యేక కార్యదర్శి జయేష్ రంజన్, ప్రత్యేక కార్యదర్శి డా విష్ణువర్ధన్‌రెడ్డి, సీఎం ప్రత్యేక కార్యదర్శి అజిత్‌రెడ్డి, ఎలక్ట్రానిక్స్, సెమీకండక్టర్స్ అండ్ ఎనర్జీ స్టోరేజ్ ఎస్కే శర్మ, ఫాక్స్‌కాన్ సంస్థ ఎస్బీజీ ప్రెసిడెంట్ బాబ్ యాంగ్, సీఎస్‌బీసీ డిఫ్యూటీ జీఎం నూ షొ కూ, సీ మేనేజర్ సైమన్ సంగ్, సంస్థ భారతదేశ ప్రతినిధి వీ లీ పాల్గొన్నారు. 

అన్ని విధాలా సహకరిస్తాం

ఫోర్త్‌సిటీలో ఫాక్స్‌కాన్ సంస్థ పరిశ్రమలు పెట్టేందుకు అవసరమైన అన్ని అనుమతులు ఇవ్వడంతోపాటు అవసరమైన మద్దతు అందజేస్తామని ఫాక్స్‌కాన్ చైర్మన్ యాంగ్ లియూకు సీఎం హామీ ఇచ్చారు. ఫోర్త్ సిటీలో పెట్టుబడులు పెట్టాలని ఆహ్వానించారు. పారిశ్రామిక అభివృద్ధికి సీఎం రేవంత్‌రెడ్డి నేతృత్వంలోని ప్రభుత్వం తీసుకుంటున్న చర్యలు, అందిస్తున్న ప్రోత్సాహకాలు, ఇటీవల సీఎం నేతృత్వంలో తమ బృందం అమెరికా, దక్షిణ కొరియాలో పర్యటించి దిగ్గజ పారిశ్రామిక సంస్థలతో జరిపిన చర్చలు, చేసుకున్న ఒప్పందాల గురించి యంగ్ లియూకు ఐటీ, పరిశ్రమల శాఖ మంత్రి శ్రీధర్‌బాబు వివరించారు.