తాటి చెట్టు.. ప్రాణం గుప్పిట్లో!
- తాటి చెట్టే జీవనాధారం.. అదే ప్రాణాలకు ముప్పు!
- కుటుంబం కోసం ప్రమాదంతో చెలిమి చేస్తున్న గౌడ కార్మికులు
- ప్రభుత్వం గుర్తించి ఆదుకోవాలని గౌడ కులస్తుల వేడుకోలు
మంథని, అక్టోబర్ 6 (విజయక్రాంతి): ఒక చేతిలో పనిముట్టు.. మరో చేతిలో కుటుంబ భవిష్యత్తు.. కళ్ల ముందు తాటి చెట్టు(Palmyra palm tree).. మనసులో భార్యా పిల్లల ముఖాలు. ప్రాణాలకు ప్రమాదమని తెలిసినా కుటుంబం కోసం ప్రతిరోజూ తాటి చెట్టు ఎక్కాల్సిందే. ఒక్కసారి కాలు జారితే ప్రాణం పోవడమే కాదు.. ఓ కుటుంబం భవిష్యత్తే అంధకారంలో పడే పరిస్థితి. ఇదీ తరతరాలుగా కులవృత్తిని నమ్ముకుని జీవిస్తున్న గౌడ కార్మికుల(toddy tappers) బతుకు పోరాటం.
తెల్లవారకముందే చెట్ల వద్దకు చేరుకుని తాటి చెట్లు ఎక్కి(Climbing palm trees) కల్లు సేకరించి(Collecting toddy) జీవనం సాగిస్తున్నారు. ఎండ, వాన, చలి అనే తేడా లేకుండా వృత్తిని కొనసాగిస్తున్నారు. ఎత్తున చెట్లపై ఏమాత్రం పట్టుతప్పినా కిందపడే ప్రమాదం ఉన్నప్పటికీ కుటుంబ పోషణ కోసం ప్రమాదాన్ని లెక్కచేయడం లేదు.
ఒక్క క్షణం అజాగ్రత్త.. కుటుంబం రోడ్డునే
తాటి చెట్టు నుంచి జారిపడి గాయపడితే చికిత్సకు భారీగా ఖర్చవుతుంది. నెలల తరబడి పని చేయలేని పరిస్థితి వస్తే కుటుంబ ఆదాయం నిలిచిపోతుంది. అదే ప్రాణాంతక ప్రమాదం జరిగితే సంపాదించే వ్యక్తిని కోల్పోయిన కుటుంబం దిక్కుతోచని స్థితిలో పడే ప్రమాదం ఉంది. అందుకే గౌడ కార్మికులకు ప్రమాద బీమా, తక్షణ వైద్య సహాయం, కుటుంబాలకు ఆర్థిక భరోసా అత్యవసరం.
రక్షణ పరికరాలు ఎక్కడ?
తాటి చెట్లు ఎక్కే కార్మికులకు ఆధునిక భద్రతా పరికరాలు అందించి ప్రమాదాలను తగ్గించాల్సిన అవసరం ఉంది. వృత్తిలో కొనసాగలేని వృద్ధ గౌడ కార్మికులకు పింఛన్తో పాటు వారి కుటుంబాల్లోని యువతకు ప్రత్యామ్నాయ ఉపాధి అవకాశాలు కల్పించాలనే డిమాండ్ వినిపిస్తోంది.
మా చెమటతో కుటుంబాలు నడుస్తున్నాయి.. మా కుటుంబాలకు భరోసా ఎప్పుడు?
గౌడ కార్మికుల శ్రమకు తగిన గుర్తింపు, గౌరవం, భద్రత కల్పించాలని వారు కోరుతున్నారు. సంక్షేమ పథకాలు అర్హులైన ప్రతి కుటుంబానికి చేరేలా అధికారులు ప్రత్యేక చర్యలు తీసుకోవాలని విజ్ఞప్తి చేస్తున్నారు. తాటి చెట్టు వారికి జీవనాధారం.. కానీ అదే చెట్టు ఏ క్షణంలో ప్రాణాలకు ముప్పుగా మారుతుందో తెలియని పరిస్థితి. కుటుంబం కోసం ప్రాణాలను పణంగా పెడుతున్న గౌడ కార్మికుల జీవితాల్లో ప్రభుత్వం భద్రత, సంక్షేమం, ఆర్థిక భరోసాతో వెలుగు నింపాల్సిన అవసరం ఉంది.
