హైదరాబాద్‌లో స్లాష్‌బీఐ జీసీసీ
- డేటా ఇంటెలిజెన్స్, ఏఐ, బిజినెస్ అనలిటిక్స్ రంగాల్లో సేవలు
- 275 మందికి లభించనున్న ఉపాధి
- వచ్చే 7 ఏళ్లలో 100 మిలియన్ డాలర్ల పెట్టుబడి
- జీసీసీ ప్రారంభోత్సవంలో మంత్రి శ్రీధర్‌బాబు
హైదరాబాద్, నవంబర్ 9 (విజయక్రాంతి): అమెరికాలోని జార్జియా రాష్ట్రం డులూత్ కేంద్రంగా ఎంటర్‌ప్రైజ్ డేటా ఇంటెలిజెన్స్, బిజినెస్ అనలిటిక్స్, ఆర్టిఫిషియల్ ఇంటెలిజెన్స్ రంగాల్లో సేవలందిస్తున్న స్లాష్‌బీఐ హైదరాబాద్‌లో తన గ్లోబల్ కెపబిలిటీ సెంటర్(Global Capability Center)ను ఏర్పాటు చేసింది. గచ్చిబౌలి ఫైనాన్షియల్ డిస్ట్రిక్ట్‌లో 20 వేల చదరపు అడుగుల విస్తీర్ణంలో అభివృద్ధి చేసిన ఈ కార్యాలయాన్ని సోమవారం ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు లాంఛనంగా ప్రారంభించారు.
ప్రస్తుతం నగరంలో 515కు పైగా జీసీసీలు ఉండగా, వాటిలో ౩ లక్షల మందికి పైగా నిపుణులు పనిచేస్తున్నారని మంత్రి ఈ సందర్భంగా పేర్కొన్నారు. గతేడాది దేశంలోనే అత్యధికంగా 70కిపైగా కొత్త జీసీసీలు హైదరాబాద్‌లో తమ కార్యకలాపాలు ప్రారంభించాయని తెలిపారు. వచ్చే ఏడాదిలో కొత్తగా 100 జీసీసీలను ప్రారంభించాలని లక్ష్యంగా పెట్టుకున్నామని వెల్లడించారు.
జీసీసీలను సంప్రదాయ సేవలకే పరిమితం చేయకుండా ప్రపంచ స్థాయి ఉత్పత్తుల రూపకల్పన, పరిశోధన, సాంకేతిక ఆవిష్కరణలకు కేంద్రాలుగా తీర్చిదిద్దేందుకు కృషి చేస్తున్నామని తెలిపారు. ఏఐ, డేటా అనలిటిక్స్, సైబర్ సెక్యూరిటీ, ప్రొడక్ట్ ఇంజినీరింగ్ తదితర రంగాల్లోనూ కీలక పాత్ర పోషించేలా వాటిని ప్రత్యేకంగా ప్రోత్సహిస్తున్నామని చెప్పారు. స్లాష్‌బీఐ ప్రపంచవ్యాప్తంగా 39 దేశాల్లో 500కు పైగా ఎంటర్‌ప్రైజ్ సంస్థలకు సేవలందిస్తోందని మంత్రి శ్రీధర్ బాబు వివరించారు.
రాబోయే 5 నుంచి 7 ఏళ్లలో హైదరాబాద్‌లో 100 మిలియన్ అమెరికన్ డాలర్ల పెట్టుబడులు పెట్టేందుకు స్లాష్‌బీఐ ముందుకొచ్చిందని తెలిపారు. హైదరాబాద్ కేంద్రంగా డేటా ఇంటెలిజెన్స్ ప్లాట్ ఫామ్‌తో పాటు స్లాష్‌బీఐ సామర్థ్యాలనూ అభివృద్ధి చేస్తుందని, ఇక్కడ కొత్తగా 275 మంది నిపుణులకు ఉపాధి లభిస్తుందని వెల్లడించారు. కార్యక్రమంలో ఎమ్మెల్యే యెన్నం శ్రీనివాస్‌రెడ్డి, స్లాష్‌బీఐ సీఈఓ నవీన్ మిగ్లానీ, ప్రెసిడెంట్, సీటీఓ కిరణ్ రెడ్డి పాశం తదితరులు పాల్గొన్నారు.
