వికెట్ తేడాతో పాకిస్థాన్ పై భారత్ విజయం
క్రికెట్‌లో అసలైన థ్రిల్లర్ అంటే ఇదేనేమో! చేతిలో రెండు వికెట్లు మాత్రమే.. గెలవాలంటే భారీ పరుగులు చేయాల్సిన పరిస్థితి. అయినా భారత యువ క్రికెటర్లు ఏమాత్రం వెనక్కి తగ్గలేదు. అద్భుతమైన పోరాటంతో చిరకాల ప్రత్యర్థి పాకిస్థాన్‌కు షాకిచ్చారు. అండర్-19 ఆసియా కప్(India U19 Asia Cup) ఫైనల్లో 338 పరుగుల భారీ లక్ష్యాన్ని చివరి బంతికి ఛేదించి ఒక్క వికెట్ తేడాతో ఘనవిజయం సాధించారు.
ముందుగా బ్యాటింగ్ చేసిన పాకిస్థాన్(Pakistan) నిర్ణీత 50 ఓవర్లలో 9 వికెట్ల నష్టానికి 337 పరుగులు చేసింది. ఉస్మాన్ ఖాన్ (107) శతకంతో చెలరేగగా.. అబ్దుల్ ఖాదిర్ (80), కెప్టెన్ ఫర్హాన్ యూసఫ్ (63) రాణించారు. భారత బౌలర్లలో కావ్య పటేల్ నాలుగు వికెట్లు పడగొట్టగా, తెలుగు ఆటగాడు చిగురుపాటి వెంకట మూడు వికెట్లతో సత్తా చాటాడు.
338 పరుగుల లక్ష్యంతో బరిలోకి దిగిన భారత్(India)కు ఓపెనర్లు మంచి ఆరంభం ఇచ్చారు. కెప్టెన్ లక్ష్య రాజేశ్ రైచందాని (80), ఆర్యవీర్ సెహ్వాగ్ (58) కీలక ఇన్నింగ్స్ ఆడారు. అయితే ఆ తర్వాత వరుసగా వికెట్లు పడటంతో భారత్ కష్టాల్లో పడింది. 252 పరుగులకే 8 వికెట్లు కోల్పోవడంతో పాక్ విజయం ఖాయమని అంతా భావించారు.
ఈ క్లిష్ట పరిస్థితుల్లో మనాల్ చౌహాన్ (47) దూకుడుగా ఆడాడు. మరోవైపు మోహిత్ ఉల్వా (49) క్రీజులో పాతుకుపోయి జట్టును విజయతీరాలకు చేర్చే బాధ్యత తీసుకున్నాడు. మనాల్ ఔటైన తర్వాత తెలుగు ఆటగాడు చిగురుపాటి వెంకట (11)తో కలిసి మోహిత్ అద్భుతంగా పోరాడాడు.
చివరి రెండు వికెట్లకు 87 పరుగులు జోడించి మ్యాచ్ స్వరూపాన్నే మార్చేశారు. చివరి బంతి వరకు ఉత్కంఠ కొనసాగగా.. మోహిత్ ఫోర్‌తో భారత్ విజయాన్ని ఖాయం చేశాడు. మొత్తంగా 50 ఓవర్లలో 9 వికెట్లకు 339 పరుగులు చేసి ఒక్క వికెట్ తేడాతో పాకిస్థాన్‌ను ఓడించింది. ఈ విజయంతో భారత యువ జట్టు అండర్-19 ఆసియా కప్‌ను కైవసం చేసుకుంది. ముఖ్యంగా తెలుగు ఆటగాడు చిగురుపాటి వెంకట కీలక సమయంలో చూపిన పోరాటపటిమ తెలుగు క్రికెట్ అభిమానుల్లో ఆనందం నింపింది.
