తుఫాన్ వాహనం-ఆటో ఢీకొని ఒకరు మృతి

మరొకరికి తీవ్ర గాయాలు..

బాన్సువాడ, నవంబర్ 15 (విజయక్రాంతి): కామారెడ్డి జిల్లా మహమ్మద్ నగర్ మండలం గాలిపూర్ గ్రామ చౌరస్తా ప్రధాన రహదారి పై ఆదివారం ఉదయం ఘోర రోడ్డు ప్రమాదం(Road Accident) చోటుచేసుకుంది. తుఫాన్ వాహనం, ఆటో ఢీకొన్న సంఘటనలో ఒకరు మృతి చెందగా మరొకరికి తీవ్ర గాయాలు అయ్యాయి. నిజాంసాగర్ వైపు వెళ్తున్న తుఫాన్ వాహనం, హైదరాబాద్ నుంచి బాన్సువాడకు వస్తున్న ఆటోను ఢీకొట్టింది. ఈ ప్రమాదంలో బాన్సువాడ పట్టణంలోని సంగమేశ్వర కాలనీకి చెందిన ఆటో డ్రైవర్ హుస్సేనీ(28) అక్కడికక్కడే మృతి చెందాడు.ఆటోలో హుస్సేనీతో పాటు ప్రయాణిస్తున్న అతని సోదరుడు అబ్బుకు తీవ్ర గాయాలయ్యాయి. ప్రమాదం జరిగిన వెంటనే అతడిని బాన్సువాడ ఆసుపత్రికి తరలించి చికిత్స అందిస్తున్నారు.

హుస్సేనీ హైదరాబాద్‌లో ఆటో నడుపుతూ ర్యాపిడో సేవలు అందించేవాడు. ఆదివారం సెలవు కావడంతో భార్య, పిల్లలను చూసేందుకు హైదరాబాద్ నుంచి బాన్సువాడకు వస్తుండగా మార్గమధ్యంలో ఈ ప్రమాదం జరిగింది. కుటుంబ సభ్యులను కలిసేందుకు వస్తున్న వ్యక్తి రోడ్డు ప్రమాదంలో మృతి చెందడంతో బాన్సువాడలో విషాద ఛాయలు అలుముకున్నాయి. పోలీసులు కేసు నమోదు చేసి దర్యాప్తు చేస్తున్నారు. మృతదేహాన్ని పోస్టుమార్టం బాన్సువాడ ప్రభుత్వ ఏరియా ఆసుపత్రికి తరలించారు.