బీసీల డిమాండ్లు పరిష్కరించాలి
జాయింట్ కలెక్టర్కు బీసీ హక్కుల పోరాట సమితి వినతి
మంచిర్యాల క్రైమ్, (విజయక్రాంతి): బీసీల న్యాయమైన డిమాండ్లను రాష్ట్ర ప్రభుత్వం(State Government) వెంటనే పరిష్కరించాలని జాతీయ బీసీ హక్కుల పోరాట సమితి(BC Rights Struggle Committee) నాయకులు డిమాండ్ చేశారు. ఈ మేరకు మంచిర్యాల జిల్లా జాయింట్ కలెక్టర్కు వినతిపత్రం సమర్పించారు. నామినేటెడ్ పదవుల్లో బీసీలకు 50 శాతం రిజర్వేషన్లు కల్పిస్తూ చట్టం చేయాలని, బీసీల సామాజిక రక్షణ కోసం బీసీ చట్టాన్ని తీసుకురావాలని కోరారు.
ఎంబీసీల కోసం ప్రత్యేక మంత్రిత్వ శాఖ ఏర్పాటు చేయాలని, లక్ష కోట్ల రూపాయలతో బీసీ సబ్ప్లాన్ అమలు చేయాలని విజ్ఞప్తి చేశారు. స్థానిక సంస్థల్లో బీసీ రిజర్వేషన్లను ఏ, బీ, సీ, డీ గ్రూపులుగా వర్గీకరించాలని, కాంట్రాక్టు, పారిశ్రామిక రంగాల్లో బీసీలకు 50 శాతం రిజర్వేషన్లు కల్పించాలని డిమాండ్ చేశారు.
అవుట్సోర్సింగ్ ఉద్యోగాల్లోనూ 50 శాతం రిజర్వేషన్లు అమలు చేస్తూ జీవో విడుదల చేయాలని, బీసీ ఫెడరేషన్లకు పాలక మండళ్లు ఏర్పాటు చేసి నిధులు కేటాయించాలని కోరారు. సంచార కులాల సంక్షేమానికి ప్రత్యేక కార్పొరేషన్ ఏర్పాటు చేయడంతోపాటు జనాభా ప్రాతిపదికన బడ్జెట్ కేటాయించాలని ప్రభుత్వాన్ని విజ్ఞప్తి చేశారు.
తమ న్యాయమైన డిమాండ్లను ప్రభుత్వం ఇప్పటికైనా పరిష్కరించాలని, లేనిపక్షంలో ఆందోళన కార్యక్రమాలు చేపడతామని హెచ్చరించారు. ఈ కార్యక్రమంలో సమితి జిల్లా అధ్యక్షుడు గుమ్ముల శ్రీనివాస్, నాయకులు శాఖపురి భీంసేన్, జిల్లా కార్యదర్శి పెద్దన్న చంద్రకాంత్, ఎండీ లతీఫ్, చలిమల అంజయ్య, దేవస్థానం నాగరాజు, గగోరి రాజన్న, రామగిరి రాజన్నచారి తదితరులు పాల్గొన్నారు.