టీఎస్‌యూటీఎఫ్ మేడ్చల్ మండల నూతన కార్యవర్గం ఎన్నిక
మేడ్చల్ అర్బన్, నవంబర్ 9 (విజయక్రాంతి): మేడ్చల్ ఉమ్మడి మండల టీఎస్‌యూటీఎఫ్ (TSUTF) నూతన కార్యవర్గం ఎన్నికైనట్లు జిల్లా అధ్యక్షుడు కె. జైసింహారెడ్డి వెల్లడించారు. ఎల్లంపేట్ మున్సిపల్ పట్టణ పరిధిలోని నూతన్‌కల్ జిల్లా పరిషత్ పాఠశాలలో నిర్వహించిన సమావేశంలో నూతన కార్యవర్గాన్ని ఎన్నుకున్నారు. మండల అధ్యక్షుడిగా కె. సంజీవరెడ్డిని ఏకగ్రీవంగా ఎంపిక చేశారు.
ఈ సందర్భంగా సంజీవరెడ్డి మాట్లాడుతూ ఉపాధ్యాయుల హక్కుల సాధన కోసం పోరాడే ఏకైక సంఘం టీఎస్‌యూటీఎఫ్ (Teachers Union) అని అన్నారు. త్వరలో పీఆర్సీ (PRC), డీఏ (Dearness Allowance), పెండింగ్ బిల్లుల సాధన కోసం సంఘం ఆధ్వర్యంలో ఉద్యమాలు చేపట్టాలని ఉపాధ్యాయులకు పిలుపునిచ్చారు.
మేడ్చల్ మండలంలో 24 శాతం హెచ్‌ఆర్‌ఏ (HRA) కొనసాగించాలని, సీపీఎస్‌ను రద్దు చేయాలని, ఈహెచ్‌ఎస్‌ను సమర్థవంతంగా అమలు చేయాలని రాష్ట్ర ప్రభుత్వాన్ని డిమాండ్ చేశారు.
ఈ కార్యక్రమంలో గౌరవాధికారులుగా ఎస్.కె. నారాయణ, ప్రధాన కార్యదర్శిగా కె. జనార్ధన్, ఉపాధ్యక్షుడిగా వి. ప్రభాకర్, మహిళా ఉపాధ్యక్షురాలిగా ఎన్. అమృత, కోశాధికారిగా పి. శేఖర్, ఆడిట్ కమిటీ కన్వీనర్‌గా ఎం. ప్రభాకర్, జిల్లా ప్రతినిధిగా ఎం. మల్కయ్య ఎన్నికయ్యారు. జిల్లా ప్రధాన కార్యదర్శి ఎం. మదన్‌రెడ్డి, జిల్లా కార్యదర్శి కె. విజయ్ భాస్కర్‌రెడ్డితో పాటు పలువురు ఉపాధ్యాయులు పాల్గొన్నారు
