వణికిస్తున్న 'అక్వాన్' తుఫాన్

21-11-2026 | 07:05am

మరో రెండు రోజులు వానలే వానలు.. 8 జిల్లాలకు అలర్ట్ జారీ!

జార్ఖండ్‌: బలహీనపడిన తుఫాన్.. అయినా వదలని వర్షాలు! బంగాళాఖాతంలో ఏర్పడిన 'అక్వాన్’ (Akvan) తుఫాన్ ప్రభావం జార్ఖండ్‌లో ఇంకా కొనసాగుతోంది. తుఫాన్ తీవ్రత తగ్గినప్పటికీ రాష్ట్రంలోని పలు ప్రాంతాల్లో వర్షాలు కురుస్తుండటంతో వాతావరణం చల్లబడింది. ముఖ్యంగా ఉత్తర, ఈశాన్య ప్రాంతాల్లో భారీ వర్షాలు కురిసే అవకాశం ఉండటంతో వాతావరణ శాఖ (IMD) హెచ్చరికలు జారీ చేసింది.

8 జిల్లాలకు Heavy Rain Alert

శనివారం జార్ఖండ్‌లోని(Jharkhand Weather Alert) ఎనిమిది జిల్లాల్లో భారీ వర్షాలు కురిసే అవకాశం ఉందని వాతావరణ శాఖ అంచనా వేసింది. గిరిడీహ్, ధన్‌బాద్, దేవ్‌ఘర్, జమ్తారా, దుమ్కా, గొడ్డా, పాకూర్, సాహిబ్‌గంజ్ జిల్లాలకు Heavy Rain Alert ప్రకటించింది. ఇతర ప్రాంతాల్లోనూ ఆకాశం మేఘావృతమై తేలికపాటి నుంచి మోస్తరు వర్షాలు కురిసే అవకాశముంది. ఇప్పటికే రాజధాని రాంచీ సహా పలు ప్రాంతాల్లో వాతావరణం ఒక్కసారిగా మారిపోయింది. ఉదయం నుంచే మేఘాలు కమ్ముకోవడంతో పాటు అక్కడక్కడ చిరుజల్లులు కురిశాయి. వర్షానికి చల్లని గాలులు తోడవడంతో ప్రజలు చలితో ఇబ్బందులు ఎదుర్కొన్నారు.

రాంచీలో తగ్గనున్న ఉష్ణోగ్రతలు

రాజధాని రాంచీలో శనివారం ఆకాశం మేఘావృతమై ఉండటంతో పాటు అక్కడక్కడ ఉరుములు, మెరుపులతో కూడిన వర్షాలు కురిసే అవకాశం ఉంది. నగరంలో గరిష్ఠ ఉష్ణోగ్రత 23 డిగ్రీల సెల్సియస్, కనిష్ఠ ఉష్ణోగ్రత 17 డిగ్రీల వరకు నమోదయ్యే అవకాశం ఉందని వాతావరణ శాఖ తెలిపింది. తుఫాన్ ప్రభావంతో గత కొన్ని రోజులుగా రాష్ట్రంలోని దక్షిణ, మధ్య ప్రాంతాల్లోనూ వర్షాలు నమోదయ్యాయి. ఇప్పుడు వర్షాల ప్రభావం ఈశాన్య జిల్లాల వైపు కొనసాగుతోంది.

నవంబర్ 23 నుంచి వాతావరణంలో మార్పులు

నవంబర్ 22న కూడా కొన్ని ప్రాంతాల్లో మేఘాలు కమ్ముకుని తేలికపాటి వర్షాలు కురిసే అవకాశం ఉంది. అయితే భారీ వర్షాలకు సంబంధించి ఎలాంటి హెచ్చరికలు లేవు. నవంబర్ 23 నుంచి ఆకాశం క్రమంగా నిర్మలంగా మారే సూచనలు కనిపిస్తున్నాయి. దీంతో వర్షాల తీవ్రత తగ్గే అవకాశం ఉంది. మరోవైపు వర్షాల కారణంగా పగటి ఉష్ణోగ్రతలు తగ్గడంతో పాటు ఉదయం, సాయంత్రం వేళల్లో చలి తీవ్రత పెరగవచ్చు. నవంబర్ 24, 25 తేదీల్లో రాంచీతో పాటు పలు ప్రాంతాల్లో తేలికపాటి నుంచి మోస్తరు పొగమంచు (Fog) ఏర్పడే అవకాశం ఉందని వాతావరణ శాఖ అంచనా వేసింది. ఉరుములు, మెరుపులు, పిడుగులు పడే సమయంలో ప్రజలు బహిరంగ ప్రదేశాల్లో ఉండకూడదని, చెట్ల కింద ఆశ్రయం పొందవద్దని అధికారులు సూచించారు.

మరిన్ని వార్తలు