చరిత్ర సృష్టించిన KL Rahul

21-11-2026 | 06:44am

SENA దేశాల్లో సత్తా చాటిన ఏకైక భారత ఓపెనర్‌గా రాహుల్!

న్యూజిలాండ్ గడ్డపై టీమిండియా(IND vs NZ 1st Test 2026) బ్యాటర్లు అదరగొడుతున్నారు. తొలి టెస్టులో కివీస్ బౌలర్లకు దీటుగా బదులిస్తున్న భారత జట్టు పటిష్ట స్థితి దిశగా సాగుతోంది. ముఖ్యంగా టీమిండియా వైస్ కెప్టెన్ కేఎల్ రాహుల్(KL Rahul) అద్భుతమైన సెంచరీతో ఆకట్టుకున్నాడు. మరోవైపు యువ బ్యాటర్ దేవదత్ పడిక్కల్ హాఫ్ సెంచరీతో రాణిస్తూ క్రీజులో నిలిచాడు.

న్యూజిలాండ్‌తో జరుగుతున్న తొలి టెస్టులో మూడో రోజు రెండో సెషన్ ముగిసే సమయానికి భారత్ 71.5 ఓవర్లలో ఒక వికెట్ నష్టానికి 260 పరుగులు చేసింది. కేఎల్ రాహుల్ 101 పరుగులతో అజేయంగా నిలవగా.. దేవదత్ పడిక్కల్ 62 పరుగులతో క్రీజులో ఉన్నాడు. వీరిద్దరూ కలిసి రెండో వికెట్‌కు 131 పరుగుల అజేయ భాగస్వామ్యాన్ని నెలకొల్పారు. ప్రస్తుతం భారత జట్టు న్యూజిలాండ్ తొలి ఇన్నింగ్స్ స్కోరుకు ఇంకా 107 పరుగుల వెనుకంజలో ఉంది.

అంతకుముందు ఓపెనర్ యశస్వి జైస్వాల్ అద్భుతంగా ఆడి 89 బంతుల్లో 85 పరుగులు చేశాడు. మాట్ హెన్రీ బౌలింగ్‌లో బ్లండెల్‌కు క్యాచ్ ఇచ్చి వెనుదిరిగాడు. దీంతో 27.5 ఓవర్ల వద్ద 130 పరుగుల స్కోరుకు భారత్ తొలి వికెట్ కోల్పోయింది. ఆ తర్వాత రాహుల్, పడిక్కల్ బాధ్యతాయుతంగా ఆడుతూ కివీస్ బౌలర్లపై ఆధిపత్యం ప్రదర్శించారు. ఇక ఈ సెంచరీతో కేఎల్ రాహుల్ మరో అరుదైన ఘనతను అందుకున్నాడు. SENA(SENA countries ) దేశాలైన దక్షిణాఫ్రికా, ఇంగ్లండ్, న్యూజిలాండ్, ఆస్ట్రేలియాల్లో ఓపెనర్‌గా టెస్టు సెంచరీలు సాధించిన ఏకైక భారత ఆటగాడిగా చరిత్ర సృష్టించాడు. విదేశీ పిచ్‌లపై తన బ్యాటింగ్ క్లాస్‌ను మరోసారి నిరూపిస్తూ టీమిండియాకు కీలక ఇన్నింగ్స్ అందించాడు.

మరిన్ని వార్తలు