సోనియా కన్నీటి జ్ఞాపకాలు!

మాజీ ప్రధాని ఇందిరా గాంధీ హత్య దేశ చరిత్రలో ఎప్పటికీ మరిచిపోలేని విషాద ఘటన. 1984 అక్టోబర్ 31న ఆమె సొంత అంగరక్షకుల కాల్పుల్లో ప్రాణాలు కోల్పోయారు. ఈ దారుణ ఘటన సమయంలో ఇంట్లోనే ఉన్న కాంగ్రెస్ అగ్రనేత సోనియా గాంధీ తాజాగా ఆనాటి భయానక జ్ఞాపకాలను పంచుకున్నారు. కాల్పుల శబ్దం వినడం నుంచి ఆస్పత్రిలో ఇందిరా గాంధీ మరణవార్త తెలిసే వరకు జరిగిన పరిణామాలను తన ఆత్మకథలో (Autobiography) వివరించారు.

నవంబర్ 10న విడుదల కానున్న తన ఆత్మకథ 'బిలాంగింగ్: ఎ జర్నీ ఆఫ్ లవ్'లో ఈ వివరాలను పొందుపరిచారు. ఇటీవల ఓ ఇంటర్వ్యూలోనూ ఆనాటి అనుభవాలను గుర్తుచేసుకున్నారు. ఇందిరా గాంధీ కార్యాలయం తమ నివాసానికి పక్కనే ఉండేదని సోనియా తెలిపారు. అత్తగారు కార్యాలయానికి బయలుదేరిన కొద్దిసేపటికే తాను గదిలోకి వెళ్లానని, ఆ సమయంలో వరుసగా కాల్పుల శబ్దాలు (Gunshots) వినిపించాయని చెప్పారు. ఏం జరిగిందో అర్థంకాక భయంతో ఉండిపోయానని వివరించారు.

ఇంతలో ఎవరో గట్టిగా తలుపులు బాదడంతో తెరిచి చూశానని, పిల్లలు తీవ్రంగా ఏడుస్తూ కనిపించారని తెలిపారు. ఆమె నోట మాట రాకపోవడంతో గార్డెన్ వైపు సైగ చేసిందని చెప్పారు. అప్పటికే అక్కడికి అంబాసిడర్ కారు చేరుకోగా, ఇందిరా గాంధీని కారులోకి తీసుకెళ్తున్న దృశ్యం కనిపించిందని గుర్తుచేసుకున్నారు.

కారు దగ్గరకు వెళ్లి చూడగా ఇందిరా గాంధీ చీర మొత్తం రక్తంతో తడిసిపోయిందని, ఛాతీపై కూడా రక్తం కనిపించిందని సోనియా వెల్లడించారు. ఆమె కళ్లు పెద్దగా తెరిచి ఉన్నాయని, శరీరంలో ఎలాంటి కదలికలు కనిపించలేదని చెప్పారు. 'మమ్మీ.. మమ్మీ' అంటూ పిలిచినా ఎలాంటి స్పందన రాలేదని ఆవేదన వ్యక్తం చేశారు.

ఆమెను ఆస్పత్రికి తరలించే క్రమంలోనూ తీవ్ర జాప్యం జరిగిందని తెలిపారు. సైరన్ లేని కారులో భారీ ట్రాఫిక్ మధ్య ఆస్పత్రికి చేరుకోవాల్సి వచ్చిందని, అక్కడికి వెళ్లాక కూడా పలు అడ్డంకులు ఎదురయ్యాయని వివరించారు. చివరకు వైద్యులు ఇందిరా గాంధీని ఆపరేషన్ థియేటర్‌లోకి తీసుకెళ్లారని గుర్తుచేసుకున్నారు.

ఇదే సమయంలో భర్త రాజీవ్ గాంధీ, పిల్లలు రాహుల్, ప్రియాంకల గురించి ఆందోళన మొదలైందని సోనియా తెలిపారు. పిల్లలు పాఠశాలలో ఉండటంతో కమాండోలు వెంటనే వారిని ఇంటికి తీసుకొచ్చారని చెప్పారు. ఇంట్లో సిబ్బంది అంతా ఏడుస్తుండటంతో నానమ్మకు ఏమైందని పిల్లలు ప్రశ్నించారని వెల్లడించారు.

మరోవైపు పశ్చిమ బెంగాల్‌లో సభకు వెళ్లిన రాజీవ్ గాంధీకి కూడా ఇందిరా గాంధీ పరిస్థితి విషమంగా ఉందనే వార్త అందింది. బీబీసీ ప్రసారాల (BBC News) ద్వారా తల్లికి తీవ్ర గాయాలైన విషయం తెలుసుకున్న ఆయనకు పరిస్థితి అర్థమైందని సోనియా గుర్తుచేసుకున్నారు. చివరకు అదే రోజు మధ్యాహ్నం 2 గంటలకు వైద్యులు ఇందిరా గాంధీ మరణించినట్లు ప్రకటించారు. తన జీవితంలో అత్యంత విషాదకరమైన ఆ క్షణాలను సోనియా గాంధీ తన ఆత్మకథలో మరోసారి కళ్లకు కట్టినట్లు వివరించారు.