1. యుద్ధప్రాతిపదికన రవాణా సౌకర్యాల పునరుద్ధరణ
2. శవాలపై చిల్లర ఏరుకొనేలా బీఆర్‌ఎస్ వ్యవహారం
3. రెవెన్యూ, విపత్తుల నిర్వహణ మంత్రి పొంగులేటి 

హైదరాబాద్, ఆగస్టు 28 (విజయక్రాంతి): రాష్ర్టంలో కురుస్తున్న వర్షాలు, వర ద పరిస్థితులు, సహాయక చర్యలపై ఎప్పటికప్పుడు సమీక్షిస్తున్నామని రాష్ర్ట రెవెన్యూ, విపత్తుల నిర్వహణ, హౌసింగ్, సమాచార పౌరసంబంధాల శాఖ మంత్రి పొంగులేటి శ్రీనివాస్‌రెడ్డి తెలిపారు. కొద్ది సమయంలోనే ముఖ్యంగా కామారెడ్డి, మెదక్, ఆదిలాబాద్ జిల్లాల్లో కనీవిని ఎరుగని రీతిలో వర్షపాతం నమోదైందన్నారు.

అయినా ప్రాణ, ఆస్తినష్టం వీలైనంత మేరకు తగ్గించేలా చర్యలు తీసుకున్నామని చెప్పారు. జిల్లాల్లో రెవెన్యూ, పోలీసు యంత్రాంగం చిత్తశుద్ధితో పనిచేస్తున్నాయని చెప్పారు. గురువారం విపత్తుల నిర్వహణా శాఖ అధికారులతో మంత్రి సమీక్ష జరిపారు. మెదక్, కామారెడ్డి, సిరిసిల్ల, నిర్మల్ జిల్లాల కలెక్టర్లతో టెలికాన్ఫరెన్స్‌లో మాట్లాడారు. వరద పరిస్థితిపై బుధవారం మధ్యాహ్నం నుంచే సమీక్షిస్తున్నట్టు ఆయన వెల్లడించారు.

వరదల్లో చిక్కుకున్న వారికి డ్రోన్ల ద్వారా ఆహారాన్ని అందిస్తున్నామన్నారు. సిరిసిల్ల జిల్లాలోని నర్మల గ్రామం వద్ద బుధవారం మానేరు వాగు వరదల్లో చిక్కుకున్న ఐదుగురిని హెలికాప్టర్ ద్వారా రక్షించామని తెలిపారు. రాష్ర్టంలోని అన్ని జిల్లాలకు వారం కిందటే రూ.కోటి చొప్పున నిధులు విడుదల చేశామని, ప్రస్తుతం అతి భారీ వర్షాలతో దెబ్బతిన్న జిల్లాలకు అదనంగా ఎన్ని నిధులైనా మంజూరు చేస్తామని స్పష్టం చేశారు.

భారీ వర్షాలతో స్తంభించిన జాతీయ రహదారితోపాటు పంచాయతీరాజ్, ఆర్‌అండ్‌బీ రోడ్లను క్లియర్ చేశామని,  పలు మండల కేంద్రాలు, జిల్లా కేంద్రాలకు వెళ్లే రహదారి సౌకర్యాలు దెబ్బతిన్నాయని వీటిని వెంటనే పునరుద్ధరించేలా ఆదేశించామన్నారు. వర్షాలు, వరదలపై ఆయా జిల్లాల యంత్రాంగంతో నిరంతరం మానిటరింగ్ చేసుకోవాలని సూచించారు. వర్షాలు తగ్గుముఖం పట్టిన తర్వాత నష్టాన్ని అంచనా వేయాలన్నారు.

రాష్ర్టంలో వర్ష బీభత్సం దృష్ట్యా ఎన్‌డీఆర్‌ఎఫ్, ఎస్‌డీఆర్‌ఎఫ్ బృందాలు పని చేస్తున్నాయని.. అవస రాన్ని బట్టి హెలికాప్టర్‌ల ద్వారా బాధితులను ఆదుకోవడానికి సిద్ధం చేశామని వివ రించారు. కూలిపోయిన ఇండ్లు, నష్టపోయిన రైతులను ఆదుకుంటామని మంత్రి ప్రకటించారు.

మెదక్, సంగారెడ్డి జిల్లాల్లో కేవలం ఒక గంట వ్యవధిలో 700 మి.మీ. వర్షం కురవడంతో చెరువులు, కుంటలు తదితర నీటి వనరులు పూర్తిగా నిండిపో యి.. వాటి నుంచి ఉధృతంగా నీరు బయటకు వెళ్లడంతో గట్లు దెబ్బతిని తీవ్ర నష్టాన్ని కలిగించిందన్నారు. మెదక్, కామారెడ్డి జిల్లాల్లోని తండాలు మరీ ఎక్కువగా వర్ష బీభత్సానికి గురయ్యాయని చెప్పారు.