న్యూఢిల్లీ: హీరో నాగార్జున(Akkineni nagarjuna) ఢిల్లీ హైకోర్టును ఆశ్రయించారు. అనుమతి లేకుండా తన ఫొటోలు, పేరును వాడుకోకుండా ఆదేశాలు ఇవ్వాలని పిటిషన్‌ వేశారు. సినీ నటుల అనుమతి లేకుండా వారి పేరును వాడుకోవద్దంటూ ఢిల్లీ హైకోర్టు(Delhi High Court) గతంలో  ఉత్తర్వులు  జారీ చేసిన విషయం తెలిసిందే. తన వ్యక్తిత్వం,  ప్రచార హక్కులను కాపాడాలని కోరుతూ తెలుగు నటుడు అక్కినేని నాగార్జున దాఖలు చేసిన పిటిషన్‌పై మధ్యంతర ఉత్తర్వులు జారీ చేస్తామని ఢిల్లీ హైకోర్టు గురువారం తెలిపింది. ఈ పిటిషన్ జస్టిస్ తేజస్ కరియా ముందు విచారణకు వచ్చింది.

ఈ విషయంలో తాము ఉత్తర్వులు జారీ చేస్తామని ఆయన చెప్పారు.  అభిషేక్ బచ్చన్, ఐశ్వర్య రాయ్, కరణ్ జోహార్ తర్వాత, తెలుగు సూపర్ స్టార్ నాగార్జున అక్కినేని కూడా తన వ్యక్తిత్వ హక్కులను కాపాడుకోవాలని కోరుతూ ఢిల్లీ హైకోర్టు మెట్లు ఎక్కారు. సెలబ్రిటీ గుర్తింపులను దుర్వినియోగం చేయడంపై సినీ పరిశ్రమలో పెరుగుతున్న ఆందోళనల మధ్య నాగ్ ఈ నిర్ణయం తీసుకున్నట్లు తెలుస్తోంది. ఢిల్లీ హైకోర్టులో నాగార్జున తరపున న్యాయవాది ప్రవీణ్ ఆనంద్ మాట్లాడుతూ... ఆయన తెలుగు చిత్ర పరిశ్రమకు చెందిన ప్రముఖ నటుడు, 95 చిత్రాలలో నటించారు, రెండు జాతీయ అవార్డులు, 9 నంది అవార్డులు, 3 ఫిల్మ్‌ఫేర్ అవార్డులు దక్కించుకున్నారు. తెలుగు చిత్ర పరిశ్రమలో ఆయన ఒక ప్రముఖ వ్యక్తి అన్నారు. వ్యక్తిత్వ హక్కులు అంటే ఒక వ్యక్తి తన గుర్తింపును వాణిజ్యపరంగా, ప్రజాపరంగా ఉపయోగించడాన్ని నియంత్రించే చట్టపరమైన హక్కు. అవి ఒక వ్యక్తికి ప్రత్యేకంగా అనుసంధానించబడిన లక్షణాలను, అంటే వారి పేరు, ఇమేజ్, పోలిక, వాయిస్, సంతకం లేదా ట్రేడ్‌మార్క్ క్యాచ్‌ఫ్రేజ్‌లను సమ్మతి లేకుండా దోపిడీ చేయకుండా కాపాడతాయి.