ఘట్ కేసర్, నవంబర్ 30 (విజయక్రాంతి) : స్వామియే శరణం అయ్యప్పా శరణం శరణం అయ్యప్పా అంటూ వందలాది మంది అయ్యప్ప మాలాదారులు చేసిన శరణుఘోషతో ఘట్ కేసర్ పట్టణ ప్రాంతం  మారుమ్రోగింది. శివారెడ్డిగూడలోని శ్రీదండ్లగడ్డ శ్రీఆంజనేయస్వామి ఆలయంలోని శ్రీధర్మశాస్త్ర సేవా సమితి అయ్యప్పస్వామి వారి సన్నిదానంలో ఆదివారం అయ్యప్పస్వామి మహాపడిపూజ మహోత్సవం అత్యంత భక్తి శ్రద్దలతో ఎంతో ఘనంగా నిర్వహించారు.

ఈమహోత్సవంలో  ఎంపీ ఈటల రాజేందర్, ఎమ్మెల్యే చామకూర మల్లారెడ్డి, జిల్లా కాంగ్రెస్ అధ్యక్షులు తోటకూర వజ్రేష్ యాదవ్‌లతో పాటు స్థానిక ఆయా రాజకీయ పార్టీల నాయకులు పాల్గొని పూజలు నిర్వహించారు.  పడిపూజలో 18మెట్ల పూజతో పాటు మణికంఠ స్వామికి పాలాభిషేకం, నెయ్యాభిషేకం, తేనాభిషేకం, పుష్పాభిషేకాలు చేశారు.

ఉమ్మడి మండల వ్యాప్తంగా ఉన్న వందలాది మంది అయ్యప్ప మాలాదారులు, మహిళా భక్తులు కూడా పెద్ద సంఖ్యలో వచ్చి పాల్గొనడంతో పడిపూజ ప్రాంగణం కిటకిటలాడింది. అయ్యప్ప భక్త బృందం అయ్యప్పస్వామి కీర్తనలు, భజనలతో హోరెత్తించారు. దీంతో పడిపూజ మహోత్సవం అయ్యప్ప శరణుఘోషతో మార్మోగింది. అయ్యప్ప స్వాములు చేసిన పేటతుళై నృత్యాలు చూపరులను ఎంతగానో ఆకట్టుకున్నాయి. పూజలో పాల్గొన్న భక్తులందరికీ తీర్థప్రసాదాలు అందజేశారు. అన్నదాన కార్యక్రమం నిర్వహించారు.