టీఎఫ్‌ఐ ఆధ్వర్యంలో రక్తదాన శిబిరం

నేడు చిరంజీవి బ్లడ్ బ్యాంకులో నిర్వహణ

హైదరాబాద్ సిటీ బ్యూరో, అక్టోబర్ 10 (విజయక్రాంతి): తెలుగు చలనచిత్ర పరిశ్రమ (టీఎఫ్‌ఐ) నుంచి యువ చిత్రనిర్మాతలు, చిరంజీవి ఐ, బ్లడ్ బ్యాంక్‌తో కలిసి శనివారం ఉదయం ఉదయం 9 నుంచి సాయంత్రం 6 గంటల వరకు జూబ్లీహిల్స్‌లోని చిరంజీవి ఐ, బ్లడ్ బ్యాంక్‌లో రక్తదాన శిబిరాన్ని  ఏర్పాటు చేయనున్నారు.‘టీఎఫ్‌ఐ చేత.. టీఎఫ్‌ఐ కోసం’ నినాదంతో ఈ రక్తదాన శిబిరాన్ని ఏర్పాటు చేస్తున్నారు.

మూవీ ఆర్టిస్ట్స్ అసోసియేషన్, తెలుగు సినిమాటోగ్రాఫర్స్ అసోసియేషన్, రవణం స్వామి నాయుడు (సీఈవో చిరంజీవి ఐ, బ్లడ్ బ్యాంక్) సమిష్టిగా సినిమా బృందాలతో సహా చిత్ర పరిశ్రమలోని వివిధ వ్యక్తులను ఒకే పైకప్పు కిందకు తీసుకువచ్చి, టీఎఫ్‌ఐ సభ్యులు, వారి కుటుంబ సభ్యుల సంక్షేమానికి ప్రత్యేకంగా ప్రత్యేక రక్త నిల్వను ఏర్పాటు చేస్తున్నారు. టీఎఫ్‌ఐ సభ్యుల నుంచి 150 యూనిట్ల రక్తాన్ని సేకరించడమే లక్ష్యంగా పెట్టుకున్నారు.

హీరోలు, నటులు, సాంకేతిక నిపుణులు, నిర్మాతల నుంచి అభిమానులు ఈ కార్యక్రమంలో పాల్గొనవచ్చు. ఈ గొప్ప కార్యాన్ని శాంటో మోహన్ వీరంకి (స్టాండ్ అప్ రాహుల్ రచయిత, దర్శకుడు) నిర్వహిస్తున్నారు. ఈ ప్రచారానికి చిత్ర నిర్మాత శేష సింధురావు, నిర్మాత వసంత్ జుర్రు, పంపిణీదారు ధర్మేంద్ర చవటపల్లి (జీ3 సినిమా హాల్స్ యజమాని), సౌమ్యశర్మ (ఆర్కా మీడియా వర్క్స్ సృజనాత్మక అధిపతి)లతో కూడిన బృందం నాయకత్వం వహిస్తున్నారు.

నాగబాబు కొణిదెల, రాజ్ తరుణ్ (స్టాండ్ అప్ రాహుల్ ఫేమ్), వెంకటేష్ మహా (కేర్ ఆఫ్ కంచరపాలెం ఫేమ్), వంశీ పచ్చిపులుసు (గూడాచారి ఫేమ్), ప్రవీణ్ కాండ్రేగుల (సినిమాబంది ఫేమ్), సూర్య మనోజ్ వంగల (బృంద ఫేమ్), అంకిత్ కోయ్య (బ్యూటీ ఫేమ్), రామ్ చరణ్ లబాని (ఫ్యామిలీ మ్యాన్ ఫేమ్), అన్వర్ అలీ (కమిటీ కుర్రోలు ఫేమ్) ఇంకా చాలా మంది ప్రముఖులు పాల్గొంటున్నారు.