టెన్నెస్సీ: అమెరికా టెన్నెస్సీలోని(Tennessee Explosion) మిలిటరీ యుద్ధసామగ్రి ప్లాంట్ లో భారీ పేలుడు సంభవించింది. పేలుడు కారణంగా 19 మంది ఆచూకీ లభ్యం కాలేదని అధికారులు వెల్లడించారు. కనిపించకుండా పోయిన వాళ్ళు చనిపోయి ఉంటారని అధికారులు అనుమానం వ్యక్తం చేస్తున్నారు. పేలుడు ధాటికి ఒక్కసారిగా కార్లు ఎగిరిపడ్డాయి. పేలుడుకు స్పష్టమైన కారణాలు తెలియదని అధికారులు వెల్లడించారు. సమాచారం అందుకున్న ఎఫ్ బీఐ అధికారులు ఘటనాస్థలికి చేరుకొని దర్యాప్తు చేస్తున్నారు. ఉదయం 7:45 గంటలకు పేలుడు సంభవించిందని అధికారులు చెప్పారు. కంపెనీ కొండపై ఉన్న ప్రదేశం పొగలు కమ్ముకుని, పొగ కమ్ముకుంటున్నట్లు వైమానిక ఫుటేజ్‌లో చూపించారు. కనీసం అర మైలు ప్రాంతంలో శిథిలాలు చెల్లాచెదురుగా పడి ఉన్నాయని, 15 మైళ్ల (24 కిలోమీటర్లు) కంటే ఎక్కువ దూరంలో ఉన్న ప్రజలు పేలుడు శబ్దాన్ని అనుభవించారని హంఫ్రీస్ కౌంటీ షెరీఫ్ క్రిస్ డేవిస్  చెప్పారు. 

నాష్‌విల్లేకు నైరుతి దిశలో 60 మైళ్లు (97 కిలోమీటర్లు) దూరంలో ఉన్న బక్స్‌నార్ట్ ప్రాంతంలోని అటవీ కొండలపై విస్తరించి ఉన్న ఎనిమిది భవనాల కేంద్రంలో పేలుడు పదార్థాలు, మందుగుండు సామగ్రిని ప్రాసెస్ చేస్తున్నట్లు కంపెనీ వెబ్‌సైట్ పేర్కొంది. పేలుడు జరిగినప్పుడు ప్లాంట్‌లో ఎంత మంది పనిచేస్తున్నారు.. ఎంతమంది అక్కడ ఉన్నారో వెంటనే తెలియరాలేదు. ఏమి జరిగిందో తెలుసుకోవడానికి పరిశోధకులు ప్రయత్నిస్తున్నారని, పేలుడుకు కారణమేమిటో చెప్పలేమని డేవిస్ అన్నారు. నిరంతర పేలుళ్ల కారణంగా అత్యవసర సిబ్బంది మొదట్లో ప్లాంట్‌లోకి ప్రవేశించలేకపోయారని డేవిడ్ స్టీవర్ట్ అన్నారు. శుక్రవారం మధ్యాహ్నం నాటికి, పేలుళ్ల ప్రమాదం లేదని, సంఘటన స్థలం అదుపులో ఉందని హంఫ్రీస్ కౌంటీ ఎమర్జెన్సీ మేనేజ్‌మెంట్ ఏజెన్సీ ప్రతినిధి గ్రే కొల్లియర్ తెలిపారు.