భువనేశ్వర్: ఒడిశా డెంకనల్ జిల్లాలోని తుముసింఘా పోలీసు పరిధిలోని కాంతియోకటేని వద్ద శుక్రవారం ఉదయం బస్సు(Bus Overturns) బోల్తా పడిన ఘటనలో 20 మందికి పైగా గాయపడ్డారు. వారిలో ముగ్గురి పరిస్థితి విషమంగా ఉంది. దాదాపు 30 మంది ప్రయాణికులతో వెళ్తున్న బస్సు బురద కాలువ రోడ్డు గుండా వెళుతుండగా అదుపు తప్పి బోల్తా పడటంతో ఈ ప్రమాదం జరిగిందని పోలీసు వర్గాలు తెలిపాయి. "ఉదయం పర్జాంగ్ నుండి భువనేశ్వర్ వైపు బస్సు ప్రయాణం ప్రారంభించింది. కామాఖ్యనగర్-డెంకనల్ రోడ్డులోని కాంతియోకటేని వద్ద మరమ్మతు పనులు జరుగుతుండగా, బస్సు డ్రైవర్ వేగంగా వెళ్లడానికి రెంగలి బ్రాంచ్ కెనాల్ గుండా బురద రోడ్డుపైకి మళ్లించాడు. ఆ ఇరుకైన రోడ్డుపై వెళుతుండగా బస్సు బోల్తా పడి ఆరు అడుగుల లోతు కాలువలో పడిపోయింది" అని పోలీసులు తెలిపారు. 

స్థానికుల సమాచారం మేరకు కామాఖ్యనగర్ నుండి అగ్నిమాపక సిబ్బంది, పోలీసు అధికారులు(Police officers) సంఘటనా స్థలానికి చేరుకుని ప్రయాణికులను రక్షించారు. గాయపడిన వారిలో బస్సు కండక్టర్, సహాయకుడు ఉన్నారు. ప్రమాదం జరిగిన తర్వాత డ్రైవర్ అక్కడి నుండి పారిపోయాడు. గాయపడిన ప్రయాణికులను వెంటనే అన్లాబెరిని కమ్యూనిటీ హెల్త్ సెంటర్‌కు తరలించామని, అక్కడి నుండి తీవ్రంగా గాయపడిన వారిని డెంకనల్ జిల్లా ప్రధాన కార్యాలయ ఆసుపత్రికి తరలించామని తుముసింగా పోలీస్ స్టేషన్ ఇన్‌చార్జ్ ఇన్‌స్పెక్టర్ మనస్విని మొహంతి తెలిపారు. ఈ ఘటనపై కేసు నమోదు చేశామని, తదుపరి దర్యాప్తు కొనసాగుతోందని ఆమె తెలిపారు.