బెంగళూరు: భారత ఎన్నికల సంఘం (Election Commission of India) గత 10 సంవత్సరాల ఎలక్ట్రానిక్ ఓటర్ల జాబితాను వీడియో రికార్డింగ్‌లతో పాటు అందించాలని లోక్‌సభలో ప్రతిపక్ష నాయకుడు, రాహుల్ గాంధీ శుక్రవారం డిమాండ్ చేశారు. అలా చేయడంలో విఫలమైతే ఎన్నికల కమిషన్ ఎన్నికల మోసాన్ని దాచిపెట్టడం, నేరం చేయడం అవుతుందని హెచ్చరించారు. ఎన్నికల మోసానికి వ్యతిరేకంగా జరిగిన 'ఓట్ అధికార్'( Vote Adhikar rally) ర్యాలీలో పాల్గొన్న భారీ సభను ఉద్దేశించి ఎల్ఓపీ రాహుల్ గాంధీ మాట్లాడుతూ, ఈసీఐ డేటాను దాచిపెడితే, అది ఎన్నికల మోసానికి పాల్పడటంలో బీజేపీతో కుమ్మక్కవుతున్నట్లు సూచిస్తుందని అన్నారు.

"కేవలం ఒక లోక్‌సభ స్థానంలో జరిగిన మోసాన్ని బయటపెట్టడానికి ఆరు నెలలు పట్టిందని ఎన్నికల కమిషన్ అర్థం చేసుకోవాలి. మీరు డేటాను అందించకపోతే, మేము ఇప్పటికీ 15 నుండి 20 లోక్‌సభ స్థానాల్లో జరిగిన అక్రమాలను వెలికితీయగలం. మా దగ్గర ఇప్పటికే సమాచారం ఉంది. మీరు దాక్కోలేరు, తప్పించుకోలేరు. ఒక రోజు, మీరు ప్రతిపక్షాన్ని ఎదుర్కోవలసి ఉంటుంది. ప్రతి అధికారి, కమిషన్ దీని గురించి తెలుసుకోవాలి, ”అని రాహుల్ గాంధీ హెచ్చరించారు. "కర్ణాటకలోని ఒక లోక్‌సభ స్థానం ఫలితం చోరీ అయింది. ఇది రాష్ట్ర ప్రజలకు వ్యతిరేకంగా చేసిన నేరపూరిత చర్య. రాష్ట్ర ప్రభుత్వం దర్యాప్తు చేసి చర్యలు తీసుకోవాలి. 1,000 నుండి 15,000 మంది నకిలీ ఓటర్లను జాబితాలో చేర్చిన ఎన్నికల అధికారులను జవాబుదారీగా చేయాలి. మహదేవపుర అసెంబ్లీ సెగ్మెంట్‌కు సంబంధించిన నిజం బయటకు రావాలి" అని ఆయన ఆరోపించారు. 

"భారతీయ ఓటర్లందరి ఎలక్ట్రానిక్ డేటా కీలకమైన సాక్ష్యంగా నిలుస్తుందని మేము విశ్వసిస్తున్నాము. ఎవరైనా దానిని నాశనం చేస్తే, అది సాక్ష్యాలను నాశనం చేయడమే, శిక్షార్హమైన నేరం" అని చెప్పారు. దేశం మొత్తం ఎలక్ట్రానిక్ డేటాను అందుబాటులోకి తెస్తే, ప్రధానమంత్రి నరేంద్ర మోడీ మోసపూరిత మార్గాల ద్వారా ప్రధానమంత్రి అయ్యారని నేను నిరూపిస్తాను. డిజిటల్ రికార్డులు, వీడియో ఫుటేజ్‌లను అందించడానికి ఎన్నికల కమిషన్ ఎందుకు నిరాకరిస్తుందో దేశం మొత్తం ప్రశ్నించాలని రాహుల్ గాంధీ పిలుపునిచ్చారు. బెంగళూరులోని ఫ్రీడమ్ పార్క్ వద్ద జరుగుతున్న 'ఓటు అధికార ర్యాలీ'కి కాంగ్రెస్ అధ్యక్షుడు మల్లికార్జున్ ఖర్గే, సీఎం సిద్ధరామయ్య, డిప్యూటీ సీఎం డీకే శివకుమార్, ఇతర పార్టీల నేతలు హాజరయ్యారు.