బెంగళూరు: రియల్టర్‌ను అతని తల్లి ముందే హత్య చేసిన కేసులో బిజెపి ఎమ్మెల్యే( BJP MLA), మాజీ మంత్రి బైరతి బసవరాజ్‌పై కేసు నమోదు చేసినట్లు పోలీసులు బుధవారం తెలిపారు. మంగళవారం రాత్రి నగరంలోని భారతి నగర్‌లో దుండగులు కారులో వచ్చి రౌడీ షీటర్ శివప్రకాష్ అలియాస్ బిక్లు శివును హత్య చేశారు. మృతుడి తల్లి దాఖలు చేసిన ఫిర్యాదు ఆధారంగా మాజీ మంత్రితో పాటు ఇతరులపై కేసు నమోదు చేసినట్లు పోలీసులు తెలిపారు. శివప్రకాష్ తల్లి విజయలక్ష్మి తన ఫిర్యాదులో, ఎనిమిది నుండి తొమ్మిది మంది వ్యక్తులు తన కొడుకును ఇనుప రాడ్లు, కొడవళ్లతో దాడి చేస్తున్నట్లు చూశానని చెప్పారు. అతని స్నేహితుడు జోక్యం చేసుకోవడానికి ప్రయత్నించగా, వారు అతనిని కూడా ఇనుప రాడ్ తో కొట్టారు.

"నేను కేకలు వేయడంతో, చుట్టుపక్కల ప్రజలు గుమిగూడారు. ఆ గుర్తు తెలియని వ్యక్తులు నా కొడుకును హత్య చేసి, తెల్లటి స్కార్పియో వాహనం, ద్విచక్ర వాహనంలో అక్కడి నుండి పారిపోయారు. నేను వారిని చూస్తే గుర్తించగలను" అని విజయలక్ష్మి తన ఫిర్యాదులో పేర్కొంది. డీసీపీ డి దేవరాజ్, జాయింట్ కమిషనర్ రమేష్ బానోత్ సహా ఉన్నతాధికారులు సంఘటనా స్థలాన్ని సందర్శించి, శివకుమార్ పై సుదీర్ఘ నేర చరిత్ర ఉందని, అతనిపై 11 కేసులు నమోదయ్యాయని, 2006లో రౌడీ షీట్ ప్రారంభించబడిందని నిర్ధారించారు. బసవరాజ్ తో పాటు జగదీష్, కిరణ్, విమల్, అనిల్ లపై పోలీసులు కేసు నమోదు చేశారు. మాజీ మంత్రిని ఎఫ్ఐఆర్ లో 5వ నిందితుడిగా చేర్చినట్లు పోలీసులు తెలిపారు. ఫిబ్రవరి 11న, జగదీష్, కిరణ్ కిటక్నూర్‌లోని శివప్రకాష్ ఆస్తిని ఆక్రమించి, ఇద్దరు మహిళా సెక్యూరిటీ గార్డులను అక్కడి నుండి వెళ్లగొట్టారని విజయలక్ష్మి ఆరోపించారు. నిందితుడు అతనికి ఫోన్ చేసి తన కొడుకును బెదిరిస్తున్నాడని ఆమె ఆరోపించింది.