న్యూఢిల్లీ: నేషనల్ హెరాల్డ్ కేసులో కాంగ్రెస్ నాయకులు రాహుల్ గాంధీ, సోనియా గాంధీ, మరో ఐదుగురిపై ఎన్‌ఫోర్స్‌మెంట్ డైరెక్టరేట్ మోపిన మనీలాండరింగ్ ఆరోపణలను ఢిల్లీ హైకోర్టు  మంగళవారం పరిగణనలోకి తీసుకోవడానికి నిరాకరించింది. ఈ కేసులో దాఖలు చేసిన ఛార్జిషీట్ ఒక ప్రాథమిక నేరానికి సంబంధించిన ఎఫ్‌ఐఆర్ ఆధారంగా కాకుండా, ప్రైవేట్ వ్యక్తి చేసిన ఫిర్యాదుపై జరిపిన దర్యాప్తుపై ఆధారపడి ఉందని ప్రత్యేక న్యాయమూర్తి విశాల్ గోగ్నే పేర్కొన్నారు. చట్ట ప్రకారం దీనిని పరిగణనలోకి తీసుకోవడం ఆమోదయోగ్యం కాదని న్యాయమూర్తి అన్నారు.

ఈ కేసులో ఢిల్లీ పోలీసుల ఆర్థిక నేరాల విభాగం ఇప్పటికే ఎఫ్‌ఐఆర్ నమోదు చేసిందని, ఈడీ వాదనలపై యోగ్యతల ఆధారంగా తీర్పు ఇవ్వడం తొందరపాటు అవుతుందని న్యాయమూర్తి తెలిపారు. ఈడీ కాంగ్రెస్ నాయకులు సోనియా గాంధీ, రాహుల్ గాంధీతో పాటు దివంగత పార్టీ నాయకులైన మోతీలాల్ వోరా, ఆస్కార్ ఫెర్నాండెజ్, సుమన్ దూబే, సామ్ పిట్రోడా, యంగ్ ఇండియన్ అనే ఓ ప్రైవేట్ కంపెనీపై కుట్ర, మనీలాండరింగ్ ఆరోపణలు చేసింది. 

నేషనల్ హెరాల్డ్ వార్తాపత్రికను ప్రచురించే అసోసియేటెడ్ జర్నల్స్ లిమిటెడ్ (ఏజేఎల్)కు చెందిన సుమారు రూ.2,000 కోట్ల విలువైన ఆస్తులను వారు అక్రమంగా స్వాధీనం చేసుకున్నారని ఆరోపణలు వచ్చాయి. దర్యాప్తు సంస్థ ఇంకా ఆరోపిస్తూ, యంగ్ ఇండియన్‌లో గాంధీ కుటుంబం 76 శాతం మెజారిటీ వాటాలను కలిగి ఉందని, రూ. 90 కోట్ల రుణానికి బదులుగా ఏజేఎల్‌ ఆస్తులను మోసపూరితంగా చేజిక్కించుకుందని పేర్కొంది.