తిరువీర్, టీనా శ్రావ్య హీరోహీరోయిన్లుగా నటిస్తున్న కామెడీ డ్రామా ‘ది గ్రేట్ వెడ్డింగ్ షో(The Great Wedding Show)’. 7 పీఎం ప్రొడక్ష్సన్స్, పప్పెట్ షో ప్రొడక్షన్స్ బ్యానర్లపై సందీప్ అగరం, అస్మితారెడ్డి బాసిని ఈ సినిమాను నిర్మిస్తున్నారు. రాహుల్ శ్రీనివాస్ దర్శకత్వం వహిస్తున్నారు. నవంబర్ 7న సినిమా విడుదల కానుంది. ఈ నేపథ్యంలో ఈ సినిమా టీజర్‌ను స్టార్ హీరో విజయ్ దేవరకొండ, ప్రముఖ దర్శకుడు శేఖర్ కమ్ముల రిలీజ్ చేశారు. 

ఈ సందర్భంగా విజయ్ దేవరకొండ సోషల్ మీడియా ద్వారా స్పందిస్తూ.. “ప్రపంచానికి తెలియటం కంటే ముందే తిరువీర్ గురించి నాకు తెలుసు. తను కలల ప్రపంచంలో జీవించటాన్ని చూసి నేను సంతోషపడుతుంటాను. ‘ది గ్రేట్ ప్రీ వెడ్డింగ్ షో’ టీజర్ చాలా ఆసక్తికరంగా చల్లటి గాలి మనసును హత్తుకున్నట్లు ఉంది” అని పేర్కొన్నారు. ఈ మేరకు చిత్ర యూనిట్‌ను అభినందించారు. 

ఇక టీజర్‌ను గమనిస్తే.. ‘ఇదే అన్నా మా ఊళ్లో రమేశ్ ఫొటో స్టూడియో’ అనే డైలాగ్‌తో టీజర్ ప్రారంభమైంది. ‘ఈ మండలం మొత్తంలో బర్త్‌డే అయినా, వెడ్డింగ్ అయినా, ప్రీ వెడ్డింగ్ అయినా మన దగ్గరే చేయించుకుంటారన్నా..’ అనే డైలాగ్‌తో హీరో క్యారెక్టరైజేషన్‌ను రివీల్ చేశారు. ‘అరే ఈ లైట్ అక్కడ పెట్టు’ అంటూ హీరోయిన్ ముందు హీరో చేసే హడావుడి.. దానికి ఆమె భయపడే తీరు, ‘ఎవండీ మీ ఫొటో తీసుకుని మా గ్యాలరీలో పెట్టుకోవచ్చా’ అని హీరోయిన్‌ని హీరో అడగటం.. దానికి హీరోయిన్ ‘నా ఫొటో ఎందుకు’ అని అడగటం.. దానికి సమాధానంగా హీరో ‘అంటే మీరు బావుంటారు కదా’ అని సమాధానం చెబుతాడు. దానికి హీరోయిన్ ‘ఏశావులే సోపు’ అని వ్యంగ్యంగా కౌంటర్ ఇవ్వటం వంటి డైలాగ్స్ చూస్తుంటే హీరోహీరోయిన్ మధ్య లవ్‌ట్రాక్ ఎలా ఉండవచ్చో తెలుస్తోంది. 

ఓ సందర్భంలో హీరో ఓ ప్రీ వెడ్డింగ్ షూట్‌ను ఒప్పుకోవటం.. పెళ్లికూతురు తల్లి కండీషన్స్‌తో ప్రీ వెడ్డింగ్ షూట్ చేసే హీరోను ఇబ్బంది పెట్టే సన్నివేశాలు.. టీజర్ చివరలో హీరో తన అసిస్టెంట్‌తో ‘ఈ డ్రెస్ బావుందారా’ అని అడిగితే ‘హీరోలా ఉన్నావన్నా’ అని అసిస్టెంట్ అంటే హీరో ఏమో షాక్ కావటం వంటి ఫన్నీ సీన్స్‌తో టీజర్ కట్ చేయడం ద్వారా సినిమా ఎలా ఉండబోతుందనే విషయాన్ని చెప్పకనే చెప్పారు మేకర్స్. 

తిరువీర్, టీనా శ్రావ్య, మాస్టర్ రోహన్ యాక్టింగ్ ఆకట్టుకుంటోంది. సురేశ్ బొబ్బిలి సంగీతం, నేపథ్య సంగీతం, కే సోమ శేఖర్ సినిమాటోగ్రఫీ సినిమాకు ఎసెట్ అవుతున్నాయి. నరేశ్ అడుప ఎడిటర్‌గా బాధ్యతలు నిర్వహిస్తున్నారు.