శ్రీనగర్ లోని పలు ప్రాంతాల్లో పాక్ దాడులు  

జమ్మూకశ్మీర్: శ్రీనగర్ నగరంలో శనివారం తెల్లవారుజామున బహుళ పేలుళ్ల శబ్దాలు వినిపించాయి. భారత సైన్యం(Indian Army) నగరంలోని అనేక చోట్ల పాకిస్తాన్ చేసిన డ్రోన్ దాడులను అడ్డుకున్న కొన్ని గంటల తర్వాత పేలుళ్లు వినిపించాయి. శ్రీనగర్ విమానాశ్రయంపై పాక్ డ్రోన్లతో దాడికి ప్రయత్నించింది. శ్రీనగర్, చండీగఢ్ లో తెల్లవారుజామున దాడులు జరిగినట్లు సమాచారం. ఉదయం 5 గంటలకు భారీ పేలుళ్ల శబ్దాలు వినిపించినట్లు సమాచారం. నిన్న రాత్రి భారత్ లోని 26 ప్రాంతాల్లో పాక్ డ్రోన్ దాడులు చేశాయి. జమ్మూకశ్మీర్ నుంచి గుజరాత్ వరుకు పలుచోట్ల పాక్ దాడులు చేసినట్లు అధికారులు తెలిపారు.

భారత సైన్యం పాకిస్థాన్ దాడులను సమర్థంగా తిప్పికొట్టింది. సరిహద్దుల్లో పాక్ దాడులు కొనసాగుతూనే ఉన్నాయని భారత్ సైన్యం సూచించింది. అమృత్ సర్ ఖాసా కంటోన్మెంట్ పైకి పాక్ డ్రోన్ ప్రయోగించిందని భారత్ సైన్యం తెలిపింది. వచ్చిన పాక్ డ్రోన్లను వచ్చినట్లే సమర్థంగా కూల్చివేశామని రక్షణ శాఖ అధికారులు తెలిపారు. శ్రీనగర్ విమానాశ్రయం సహా ముఖ్యమైన సంస్థాపనల సమీపంలో పేలుళ్ల శబ్దాలు వినిపించాయని పిటిఐ వార్తా సంస్థ తెలిపింది. పేలుళ్ల శబ్దాలు వినిపించిన వెంటనే నగరం అంతటా సైరన్లు కూడా మోగాయి.

నగరమంతా విద్యుత్ కూడా నిలిచిపోయిందని స్థానికులు శ్రీనగర్ నుండి లైవ్‌మింట్‌కు ఫోన్‌లో తెలిపారు. సాధారణ పౌరులపై దాడులు ఆమోదనీయం కాదని భారత్ సైన్యం తెలిపింది. ఎలాంటి దాడులనైనా భారత సైన్యం దీటుగా ఎదుర్కొంటుందని పేర్కొంది. భారత క్షిపణి రక్షణ వ్యవస్థ ఎస్-400పై తప్పుడు ప్రచారం జరుగుతోందని రక్షణ శాఖ తెలిపింది. ఎస్-400 ను ధ్వంసం చేసినట్లు వచ్చిన వార్తలు నిరాధారమని రక్షణ శాఖ సూచించింది. ఎస్-400ను పాక్ ధ్వంసం చేసిందనేది అవాస్తవం అని వివరించింది. "ఉదయం 6 గంటల ప్రాంతంలో వరుసగా మూడు పేలుళ్లు సంభవించాయి. కొంత సమయం తర్వాత మరో పేలుడు సంభవించింది. ఇది అత్యంత శక్తివంతమైనది. భారీ శబ్దంతో కూడిన ప్రకంపనలా అనిపించింది. అప్పటి నుండి పేలుళ్లు సంభవించాయి కానీ అంత పెద్ద శబ్దం రాలేదు" అని శ్రీనగర్ నివాసి ఒకరు భారత్- పాకిస్తాన్ మధ్య పెరుగుతున్న ఉద్రిక్తతల మధ్య అన్నారు.