చెన్నై: తమిళనాడులోని పాళయంకోట్టైలో 27 ఏళ్ల ఐటీ ఉద్యోగి(IT employee) కవిన్ సెల్వ గణేష్ దారుణమైన హత్యను నటుడు-రాజకీయ నాయకుడు కమల్ హాసన్(Kamal Haasan ) ఖండించారు, దీనిని పరువు హత్య, కులంలో పాతుకుపోయిన సామాజిక అవమానంగా కమల్ అభివర్ణించారు. సోషల్ మీడియా ప్లాట్‌ఫామ్ ఎక్స్ లో ఒక పోస్ట్‌లో, ఈ సంఘటనపై కమల్ హాసన్ తీవ్ర విచారం వ్యక్తం చేస్తూ, రాష్ట్ర ప్రభుత్వం త్వరితగతిన చర్యలు తీసుకోవాలని కోరారు. "పాళయంకోట్టైలో 27 ఏళ్ల ఐటీ ఉద్యోగి కవిన్ సెల్వ గణేష్ పరువు హత్య దిగ్భ్రాంతికరం. ఈ దారుణమైన నేరానికి పాల్పడిన వారిని న్యాయం ముందు నిలబెట్టి, వారికి కఠిన శిక్ష పడేలా చూడాలని నేను తమిళనాడు ప్రభుత్వాన్ని గట్టిగా కోరుతున్నాను. కవిన్ కుటుంబ సభ్యులు, స్నేహితులకు నా ప్రగాఢ సానుభూతిని తెలియజేస్తున్నాను" అని ఆయన రాశారు. 

మక్కల్ నీది మయ్యం(Makkal Needhi Maiam) కుల ఆధారిత దురాగతాలకు వ్యతిరేకంగా ఐక్యంగా పోరాడాలని పిలుపునిచ్చారు. కులాన్ని మా ప్రధాన శత్రువు అని అభివర్ణించారు. కుల ఆధారిత దురాగతాల సామాజిక అవమానానికి వ్యతిరేకంగా అన్ని రాజకీయ ఉద్యమాలు(Political movements) ఐక్యంగా ఉండాలని కోరారు. ఈ సమస్య నిర్మూలించబడే వరకు మనం పోరాడాలని పిలుపునిచ్చారు. పోలీసులు తెలిపిన వివరాల ప్రకారం, షెడ్యూల్డ్ కుల వర్గానికి చెందిన గణేష్, వేరే కులానికి చెందిన మహిళతో చాలా కాలంగా సంబంధం కలిగి ఉన్నాడు. ఆదివారం, పాళయంకోట్టైలోని సిద్ధ వైద్య కేంద్రం సమీపంలో ఆ మహిళ కుటుంబ సభ్యుడు అతన్ని హత్య చేసినట్లు ఆరోపణలు ఉన్నాయి. ప్రధాన అనుమానితుడిని ఆ మహిళ సోదరుడు ఎస్. సుర్జిత్‌గా గుర్తించారు. అతడిని అదుపులోకి తీసుకున్నారు.